ලොව මෙතෙක් සිදු වූ විශාලතම ඒක පුද්ගල ක්රිප්ටෝ මුදල් වංචාවකට අදාළව චීන ජාතික කාන්තාවක් අත්අඩංගුවට ගෙන ඇති අතර, ඇය ලන්ඩනයේදී වරද පිළිගෙන තිබේ. අත්අඩංගුවට ගත් බිට්කොයින් වත්කම්වල වටිනාකම පවුම් බිලියන 5කට (ඇමෙරිකානු ඩොලර් බිලියන 6.7කට) අධික බව විදෙස් මාධ්ය වාර්තා කරයි.
සීමින් චියැන් (Zhimin Qian) නොහොත් යාඩි ෂැං (Yadi Zhang) නමැති 47 හැවිරිදි මෙම කාන්තාව, නීති විරෝධී ලෙස ක්රිප්ටෝ මුදල් ලබාගැනීම සහ සන්තකයේ තබාගැනීම සම්බන්ධයෙන් ලන්ඩනයේ සවුත්වර්ක් ක්රවුන් අධිකරණයේදී වරද පිළිගෙන ඇත.
මෙට්රොපොලිටන් පොලිසිය ප්රකාශ කළේ, ඇය 2014 සහ 2017 අතර කාලයේදී චීනයේ මහා පරිමාණ වංචාවක් මෙහෙයවා ඇති බවයි. එහිදී වින්දිතයන් 128,000කට අධික පිරිසක් රවටා සොරකම් කරන ලද මුදල් බිට්කොයින් වත්කම් ලෙස ගබඩා කර ඇති බව අනාවරණය විය. ඇය සන්තකයේ තිබූ බිට්කොයින් 61,000ක් අත්අඩංගුවට ගෙන තිබේ.
මෙම කාන්තාව වරද පිළිගැනීම වසර හතක් පුරා සිදු කළ සංකීර්ණ විමර්ශනයක ප්රතිඵලයක් බව මෙට්රොපොලිටන් පොලිසිය සඳහන් කරයි. අපරාධ වත්කම් පිළිබඳව 2018 වසරේදී ලැබුණු තොරතුරක් මත මෙම විමර්ශනය ආරම්භ කර ඇත.
පොලිසිය තවදුරටත් කියා සිටියේ, චියැන් අත්අඩංගුවට ගැනීමට පෙර වසර පහක් පුරා යුක්තියෙන් මිදී සිටි බවත්, ඇයව අත්අඩංගුවට ගැනීමට බහුවිධ අධිකරණ බලතල ඇතුළත් සංකීර්ණ විමර්ශනයක් අවශ්ය වූ බවත්ය. ඇය ව්යාජ ලේඛන භාවිත කරමින් චීනයෙන් පලා ගොස් එක්සත් රාජධානියට ඇතුළු වී ඇති අතර, එහිදී සොරකම් කරන ලද මුදල් දේපළ මිලදී ගැනීමෙන් විශුද්ධිකරණය කිරීමට උත්සාහ කර ඇති බව මෙට්රොපොලිටන් පොලිසිය වැඩිදුරටත් සඳහන් කළේය.
