අයහපත් කාලගුණික තත්ත්වය හේතුවෙන් තාවකාලිකව නවත්වා තිබූ පින්නවල අලි අනාථාගාරයේ අලි ඇතුන් මා ඔය වෙත රැගෙන යාම යළි ආරම්භ කළ බව ජාතික සත්වෝද්යාන දෙපාර්තමේන්තුව පවසයි. පසුගිය දිනවල පැවති තද වර්ෂාව හේතුවෙන් මා ඔය පිටාර ගැලීමත් සමඟ අලි ඇතුන් නාවන ස්ථානය අපිරිසිදු වීම නිසා මෙම තීරණය ගෙන තිබුණි.
ජාතික සත්වෝද්යාන දෙපාර්තමේන්තුව නිකුත් කළ නිවේදනයට අනුව, ගංවතුර තත්ත්වයත් සමඟ මා ඔයට විශාල වශයෙන් වැලි, රොන් මඩ මෙන්ම වීදුරු සහ යකඩ කැබලි ද ගසාගෙන ආ බව නිරීක්ෂණය වී ඇත. අලි ඇතුන්ගේ පාදවලට මෙම අපද්රව්යවලින් හානි සිදුවීමේ අවදානමක් පැවති බැවින්, සතුන්ගේ ආරක්ෂාව සහ සුබසාධනය උදෙසා මා ඔයට රැගෙන යාම තාවකාලිකව සීමා කිරීමට බලධාරීහු කටයුතු කළහ.
මෙම ගැටලුව නිරාකරණය කිරීම සඳහා වාරිමාර්ග දෙපාර්තමේන්තුවේ අනුමැතිය ඇතිව විශේෂ පිරිසිදු කිරීමේ මෙහෙයුමක් දියත් කෙරිණි. එහිදී එක්ස්කැවේටර් යන්ත්ර යොදා ගනිමින් අලි නාවන ස්ථානයේ රැඳී තිබූ සියලු අපද්රව්ය සහ අනතුරුදායක ද්රව්ය ඉවත් කිරීමට පියවර ගෙන තිබේ.
අදාළ පිරිසිදු කිරීම් අවසන් වීමෙන් අනතුරුව පසුගිය 24 වැනිදා සිට අලි ඇතුන් සුපුරුදු වේලාවන්හිදී මා ඔය වෙත රැගෙන යාම ආරම්භ කර ඇත. පින්නවල අලි අනාථාගාරයේ අලි ඇතුන් මා ඔයේ දිය නෑම නැරඹීමට පැමිණෙන දෙස් විදෙස් සංචාරකයින්ට දැන් පෙර පරිදිම එම සුන්දර දසුන දැකබලා ගැනීමට අවස්ථාව හිමිවේ.
