ඩුබායිහිදී අද ආරම්භ වීමට නියමිතව තිබූ යොවුන් ආසියානු කුසලාන එක්දින ක්රිකට් තරගාවලියේ අවසන් පූර්ව වටයේ තරග දෙකටම අයහපත් කාලගුණයෙන් දැඩි බාධා එල්ල වී තිබේ. ඩුබායි අයි.සී.සී. ඇකඩමි ක්රීඩාංගණ පරිශ්රයට බලපා ඇති වැසි සහිත තත්ත්වය හේතුවෙන් ශ්රී ලංකාව සහ ඉන්දියාව අතර අද පෙරවරුවේ ආරම්භ වීමට තිබූ තීරණාත්මක තරගය නියමිත වේලාවට ආරම්භ කිරීමට නොහැකි වී ඇත.
ශ්රී ලංකා යොවුන් කණ්ඩායම සහ ප්රබල ඉන්දීය කණ්ඩායම අතර පැවැත්වෙන මෙම පළමු අවසන් පූර්ව තරගය පිළිබඳව ක්රීඩා ලෝලීන් දැඩි උනන්දුවකින් පසුවූවද, පවතින වර්ෂාව හේතුවෙන් ක්රීඩාංගණය සූදානම් කිරීමට බාධා පැමිණ තිබේ. වර්ෂාව නතර වන තෙක් තරගයේ කාසියේ වාසිය උරගා බැලීම පවා ප්රමාද කිරීමට තරග සංවිධායකයින්ට සිදුව ඇත.
මේ අතර තරගාවලියේ දෙවන අවසන් පූර්ව තරගයට ද අයහපත් කාලගුණයෙන් එල්ල වී ඇත්තේ මෙවැනිම බලපෑමකි. පාකිස්ථානය සහ බංග්ලාදේශය අතර පැවැත්වීමට නියමිත එම තරගය ද පවතින වැසි සහිත තත්ත්වය හේතුවෙන් මෙතෙක් ආරම්භ කිරීමට නොහැකි වී ඇති බව ඩුබායි ක්රීඩා ආරංචි මාර්ග තහවුරු කරයි.
වර්ෂාව හේතුවෙන් අද දිනයේ තරග අතහැර දැමීමට සිදුවුවහොත්, අවසන් මහා තරගය සඳහා සුදුසුකම් ලබන කණ්ඩායම් තේරීමේදී තරගාවලියේ රෙගුලාසි අනුව ක්රියා කිරීමට සිදුවනු ඇත. කාලගුණයේ වෙනස්වීම් මත තරගයේ පන්දු වාර සංඛ්යාව අඩු කර හෝ තරගය පැවැත්වීමට බලධාරීන් උත්සාහ කරමින් සිටින බව වාර්තා වේ.
