ශ්රී ලංකාව සහ එංගලන්තය අතර පැවැත්වෙන තීරණාත්මක තෙවැනි සහ අවසන් එක්දින ක්රිකට් තරගය අද (27) කොළඹ ආර්. ප්රේමදාස ක්රීඩාංගණයේදී පැවැත්වීමට නියමිතය. තරගාවලිය 1-1ක් ලෙස දෙපිලම සම මට්ටමේ පසුවන පසුබිමක, ශ්රී ලංකාව සතු වසර පහක ද්විපාර්ශ්වික එක්දින තරගාවලි අපරාජිත වාර්තාව රැකගැනීම සඳහා අද තරගයේ ජයග්රහණය සත්කාරක කණ්ඩායමට අතිශය වැදගත් වේ.
මෙම තීරණාත්මක තරගය සඳහා මීට පෙර තරගවලදී විවේක ගන්වා සිටි ප්රබල තුන් ඉරියව් ක්රීඩක වනිඳු හසරංග නැවත කණ්ඩායමට කැඳවන බව නායක චරිත් අසලංක තහවුරු කළේය. එසේම දක්ෂ පන්දු යැවීමක නිරත වූ ජෙෆ්රි වැන්ඩර්සේ ද අද තරගයට ක්රීඩා කරනු ඇතැයි අපේක්ෂා කෙරේ. මාධ්ය හමුවේදී අදහස් දක්වමින් අසලංක සඳහන් කළේ පවන් රත්නායකගේ පිතිකරණ ස්ථානය කණ්ඩායමේ සාමූහික තීරණයක් වුවද, පෞද්ගලිකව ඔහුට ඉදිරි ස්ථානයක් ලබාදීම සුදුසු බව තමන් විශ්වාස කරන බවයි.
පසුගිය තරගයේදී තණතීරුව පිළිබඳව එංගලන්ත නායක හැරී බෲක් පළ කළ විවේචන ප්රතික්ෂේප කළ අසලංක, දෙපිලම එක්ව ලකුණු 440ක් රැස් කළ තරගයක තණතීරුව පිළිබඳව එවැනි අදහසක් දැක්වීම තේරුම් ගත නොහැකි බව පවසා සිටියේය. 2021 වසරේ සිට මෙරටදී කිසිදු එක්දින තරගාවලියක් පරාජය වී නොමැති ශ්රී ලංකා කණ්ඩායම, එම ගෞරවය රැකගැනීමේ අරමුණින් අද පස්වරු 2.30ට දිවා රාත්රී තරගයක් ලෙස එංගලන්තය සමඟ තරග වැදීමට නියමිතය.
