වෙළෙඳපොළේ මාළු මිරිස්, අමු මිරිස් කිලෝවක සිල්ලර මිල රුපියල් 1,400 ක් දක්වා ඉහළ ගොස් තිබේ.
දඹුල්ල, කැප්පෙටිපොළ ආදී ආර්ථික මධ්යස්ථානවල අමු මිරිස් කිලෝවක් ඊයේ (06 වැනිදා) දිනයේදී රුපියල් 1,000ත් 1,100ත් අතර සිල්ලර මිලකට අලෙවි කෙරුණි.
මාළු මිරිස් මිල ගණන් දැනට මාස කීපයක සිටම අඛණ්ඩව ඉහළ මිලක පැවතියත්, පසුගිය වැසි තත්ත්වයත් සමග අමු මිරිස් මිල ගණන් ද ඉහළ ගොස් තිබේ. ආර්ථික මධ්යස්ථානවලට සැපයෙන අමු මිරිස් තොග සීමිත වීම හේතුවෙන් මෙලෙස මිල ගණන් ඉහළ ගොස් ඇතැයි ද වෙළෙඳපොළ තොරතුරු පවසයි.
මාළු මිරිස්, අමු මිරිස්වලට අමතරව අනෙකුත් එළවළු වර්ගවල මිල ගණන්ද ඉහළ ගොස් තිබේ.
පසුගිය දිනවල කැරට් කිලෝවක තොග මිල රුපියල් 40 ත් 50 ත් අතර මිලක් දක්වා පහත බැස තිබූ අතර, මේ වනවිට කැරට් කිලෝවක තොග මිල රුපියල් 400ක් දක්වා වැඩිවී ඇත. ඉදිරි දිනවලදී එළවළු මිල ගණන් තවදුරටත් ඉහළ යනු ඇතැයි ද ආර්ථික මධ්යස්ථාන තොරතුරු සඳහන් කරයි.
