රටපුරා ප්රශ්නගත බහාලුම් 323 නිදහස් කිරීමේ සිද්ධිය සම්බන්ධයෙන් හිටපු පාර්ලිමේන්තු මන්ත්රී උදය ගම්මන්පිල මහතා අද (ජූනි 09) උදෑසන අපරාධ පරීක්ෂණ දෙපාර්තමේන්තුව (CID) වෙත පැමිණි අතර එහිදී, සිද්ධියට අදාළව තොරතුරු රැසක් ඔහු මාධ්ය වෙත හෙළි කළේය.
ගම්මන්පිල මහතා පැවසුවේ, මෙම ආන්දෝලනාත්මක බහාලුම් 323ට අදාළ සම්පූර්ණ ලැයිස්තුව ප්රසිද්ධ කිරීමට තමා සූදානම් බවයි.
“මා සතුව සත්ය කරුණු තියෙනවා. කිසිම වෙලාවක සාක්ෂි නැතිව මම මේ වගේ චෝදනාවක් කරන්නේ නැහැ,” ඔහු තරයේ කියා සිටියේය.
එමෙන්ම, මෙම සිද්ධියට අදාළ තීරණ ගත් ඇතැම් නිලධාරීන් මේ වන විටත් රටින් පිටවීමට උත්සාහ කරන බවට තොරතුරු ලැබී ඇති බවද ගම්මන්පිල මහතා හෙළි කළා. ඒ අනුව, එම නිලධාරීන්ට විදෙස් ගමන් තහනමක් පනවන ලෙස CIDයෙන් දැඩිව ඉල්ලා සිටින බවට ඔහු අවධාරණය කළ අතර මේ පිළිබඳව වහාම විධිමත් පරීක්ෂණයක් සිදුකළ යුතු බවටත් ඔහු බලධාරීන්ගෙන් ඉල්ලා සිටියේය.
දේශපාලන විචාරකයින් පෙන්වා දෙන්නේ, ගම්මන්පිල මහතාගේ මෙම ප්රකාශයන් සමඟ බහාලුම් සිද්ධිය සම්බන්ධයෙන් ඉදිරියේදී තවත් පුළුල් තොරතුරු රැසක් අනාවරණය වීමට ඉඩ ඇති බවයි.
