යාපනය – පේදුරුතුඩුව නගර සභා සීමාවට අයත් හෝටල් සහ ආහාර අලෙවිසැල් තුළ ලන්ච් ෂීට් භාවිතය සම්පූර්ණයෙන්ම තහනම් කිරීමට තීරණය කර තිබේ.
පේදුරුතුඩුව නගර සභාව නිවේදනයක් නිකුත් කරමින් සඳහන් කළේ, මෙම නව තහනම 2026 ජනවාරි මස 01 වනදා සිට ක්රියාත්මක වන බවයි. පේදුරුතුඩුව නගර සභාවේ මහජන සෞඛ්ය පරීක්ෂක පී. දිනේෂ් මහතා සහ හෝටල් හිමිකරුවන් අතර පැවැති විශේෂ සාකච්ඡාවකදී මෙම තීරණයට එළඹ ඇත.
පරිසර දූෂණය අවම කිරීමේ අරමුණින් ගනු ලැබූ මෙම තීරණය උල්ලංඝනය කරන පිරිස්වලට එරෙහිව දැඩි නීතිමය පියවර ගන්නා බව බලධාරීහු අවධාරණය කරති. ඒ අනුව, ලන්ච් ෂීට් වෙනුවට ආහාර එතීම සඳහා කෙසෙල් කොළ, නෙළුම් කොළ සහ තේක්ක කොළ වැනි ස්වාභාවික දෑ භාවිතා කරන ලෙසත්, ආහාර ඇසුරුම් කිරීම සඳහා අනුමත ඇලුමිනියම් ෆොයිල් හෝ වෙනත් සුදුසු බඳුන් භාවිතා කරන ලෙසත් උපදෙස් ලබා දී තිබේ.
මෙම නියෝග නොතකා කටයුතු කරන වෙළෙඳසැල් හිමිකරුවන්ගේ ව්යාපාරික බලපත්රය අත්හිටුවීමට නගර සභා සභාපතිවරයාට ඇති බලතල ප්රකාරව කටයුතු කරන බවද නගර සභාව වැඩිදුරටත් සඳහන් කළේය.
