ඇමෙරිකානු ප්රහාර හමුවේ අර්බුදයට පත්ව ඇති වෙනිසියුලාවට නොමිලේ අන්තර්ජාල සේවාවන් සැපයීමට ඊලෝන් මස්ක්ගේ ස්ටාර්ලින්ක් ආයතනය තීරණය කර තිබේ. ස්ටාර්ලින්ක් ආයතනය සිය එක්ස් ගිණුම හරහා නිවේදනය කර ඇත්තේ වෙනිසියුලානු ජනතාවට සිය සේවාවන් සඳහා කිසිදු ගාස්තුවකින් තොරව ප්රවේශ වීමට අවස්ථාව ලබා දෙන බවයි. දීර්ඝ කාලයක සිට රජයේ දැඩි රෙගුලාසි මෙන්ම නිතර නිතර සිදුවන විසන්ධි කිරීම් හේතුවෙන් පීඩා විඳි වෙනිසියුලානු ජනතාවට මෙම පියවර විශාල සහනයක් වනු ඇතැයි අපේක්ෂා කෙරේ.
මේ අතර, වෙනිසියුලාවට එල්ල වූ ප්රහාරවලින් පසුව කැරබියන් ගුවන් කලාපය වටා පනවා තිබූ දැඩි ගුවන් සීමාවන් ඉවත් කිරීමට ද අමෙරිකානු බලධාරීන් පියවර ගෙන තිබේ. එක්සත් ජනපද ප්රවාහන ලේකම් ෂෝන් ඩෆි සිය සමාජ මාධ්ය ගිණුම හරහා සඳහන් කර ඇත්තේ අදාළ ගුවන් සීමා ලිහිල් කිරීම සම්බන්ධයෙන් මේ වන විටත් ගුවන් සමාගම් දැනුවත් කර ඇති බවයි. ඊයේ දින සිදුකළ ප්රහාරවලින් පසු පනවන ලද මෙම ගුවන් සීමා හේතුවෙන් කලාපය හරහා ගමන් කිරීමට නියමිතව තිබූ ගුවන් ගමන් රැසක් අවලංගු කිරීමට ද බලධාරීන්ට සිදුව තිබුණි.
යුධමය වාතාවරණය පිළිබඳව පවතින අලුත්ම වාර්තා පෙන්වා දෙන්නේ අමෙරිකානු ප්රහාර හමුවේ වෙනිසියුලාවේ පුද්ගලයින් 40 දෙනෙකු පමණ මේ වන විට ජීවිතක්ෂයට පත්ව ඇති බවයි. මියගිය පිරිස අතර සිවිල් වැසියන් මෙන්ම වෙනිසියුලානු හමුදා සහ ආරක්ෂක සාමාජිකයින් ද සිටින බව විදෙස් මාධ්ය වාර්තා කරයි. මීට අමතරව තවත් නිලධාරීන් පිරිසක් තුවාල ලබා ඇති අතර, ඔවුන්ගේ නිශ්චිත සංඛ්යාව මෙතෙක් නිල වශයෙන් තහවුරු කර නොමැත.
