දිට්වා සුළි කුණාටු තත්ත්වය හේතුවෙන් පීඩාවට පත් වූ ගොවි සහ ධීවර ජනතාවට සහන සැලසීමක් ලෙස ඔවුන්ගේ මාසික විශ්රාම වැටුප් ලබාගැනීමේ කාලසීමාව තවදුරටත් දීර්ඝ කිරීමට රජය පියවර ගෙන තිබේ. කෘෂිකාර්මික හා ගොවිජන රක්ෂණ මණ්ඩලය නිවේදනයක් නිකුත් කරමින් සඳහන් කරන්නේ 2025 දෙසැම්බර් මාසයට අදාළ විශ්රාම වැටුප් ලබාගැනීමේ අවසාන දිනය 2026 වසරේ ජනවාරි මස 31 වැනිදා දක්වා දීර්ඝ කළ බවයි.
පසුගියදා ඇති වූ ආපදා තත්ත්වය මත ගමනාගමන බාධා හා අනෙකුත් දුෂ්කරතා හේතුවෙන් බොහෝ පිරිසකට නියමිත දිනට තැපැල් කාර්යාල වෙත ළඟා වීමට නොහැකි වී තිබුණි. මෙම තත්ත්වය සැලකිල්ලට ගනිමින් මීට පෙර එම කාලය දෙසැම්බර් 31 දක්වා දීර්ඝ කර තිබූ අතර, පවතින ප්රායෝගික අපහසුතා මත එය තවත් මසකින් දීර්ඝ කිරීමට දැන් තීරණය කර ඇත. ඒ අනුව ප්රතිලාභීන්ට වැඩ කරන දිනයන්හිදී තමන්ට ආසන්න තැපැල් හෝ උප තැපැල් කාර්යාල මඟින් සිය දීමනා ලබාගත හැකිය.
දත්ත වාර්තාවලට අනුව මේ වන විට ගොවි විශ්රාම වැටුප් ප්රතිලාභ ලබන සංඛ්යාව 178,753ක් වන අතර ධීවර විශ්රාම වැටුප් ලාභීන් 6,312ක් මෙරට සිටිති. මෙම සමස්ත ප්රතිලාභීන් පිරිස වෙනුවෙන් රජය මාසිකව වැය කරන මුදල රුපියල් මිලියන 413කි. ආපදා තත්ත්වයන් හමුවේ වුවද මෙම ගෙවීම් බාධාවකින් තොරව ජනතාව අතට පත් කිරීම රජයේ අරමුණ වී තිබේ.
