දිවයිනට බලපා ඇති අයහපත් කාලගුණ තත්ත්වය හේතුවෙන් ආපදාවට පත් ජනතාවට අවශ්ය කඩිනම් සහන අඛණ්ඩව සලසන ලෙසත් මෙම සහන සේවා කටයුතු වෙනුවෙන් රුපියල් මිලියන 50ක් වෙන් කරන ලද අතර එය ප්රමාණවත් නොවන හෙයින් ඊට මුදල් ප්රතිපාදන තවත් ඉහළ දැමීමට පියවර ගන්නා ලෙසත් ජනාධිපති අනුර කුමාර දිසානායක මුදල් අමාත්යාංශ නිලධාරීන්ට උපදෙස් දෙයි.
එසේ ම, අයහපත් කාලගුණ තත්ත්වය හමුවේ ගංවතුර සහ නාය යෑම්වලට ගොදුරු වී ඇති දිස්ත්රික්කවල ජනතාවගේ ආරක්ෂාව පිළිබඳ විශේෂ අවධානයකින් කටයුතු කරන ලෙසත්, සහන සේවා කටයුතු කාර්යක්ෂමව ක්රියාත්මක කිරීමට අවශ්ය සහාය ලබා දෙන ලෙසත් ජනාධිපති අනුර කුමාර දිසානායක විසින් ආරක්ෂක අමාත්යාංශයේ ලේකම්වරයා වෙත දැනුම් දෙන ලදී.
හදිසි ආපදා තත්ත්වය හේතුවෙන් විපතට පත් සියලු ජනතාවට අවශ්ය සහන සැලසීමට රජය කටයුතු කරන බව සඳහන් කළ ජනාධිපතිවරයා, අදාළ පළාත්වල රාජ්ය නිලධාරීන් සම්බන්ධ කර ගැනීමෙන් ඉදිරියේදී ජනතාවට එම සහන ලබා ගත හැකි බව පැවසීය.
එතෙක් පරීක්ෂාකාරීව කටයුතු කරන ලෙස ද ජනාධිපතිවරයා ජනතාවගෙන් ඉල්ලා සිටින අතර මෙම සහන සේවා කටයුතු වෙනුවෙන් රුපියල් මිලියන 50ක් වෙන් කරන ලෙස මුදල් අමාත්යාංශයට උපදෙස් දුන් ජනාධිපතිවරයා අදාළ සහන නිසි පරිදි ජනතාව අතට පත් කිරීමට මනා සම්බන්ධීකරණයකින් යුතුව කටයුතු කරන ලෙස ද රාජ්ය නිලධාරීන්ට වැඩිදුරට ත් දැනුම් දුන්නේ ය.
ආරක්ෂක මාණ්ඩලික ප්රධානී කාර්යාලය හරහා ආපදාවට පත් සියලු දිස්ත්රික්කවල රාජ්ය නිලධාරීන්ගේ සම්බන්ධීකරණයෙන් මේ වන විට සහන සේවා කටයුතු ආරම්භ කර තිබේ.
හදිසි ආපදා තත්ත්වයන් පිළිබඳ තොරතුරු ආපදා කළමනාකරණ මධ්යස්ථානයේ 117 ඇමැතුම් මැදිරිය සහ 0112136136, 0112136222, 0112670002 දුරකතන අංක ඇමතීමෙන් දැනුම් දිය හැකි ය
