2026 නව වසරේ උදාවත් සමඟ ගතවූ පළමු පැය 24 තුළ දිවයිනේ විවිධ ප්රදේශවලින් මනුෂ්ය ඝාතන, මහා පරිමාණ මත්ද්රව්ය වැටලීම් සහ මාරක රිය අනතුරු රැසක් වාර්තා වී තිබේ. පොලිස් මාධ්ය කොට්ඨාසය නිකුත් කළ නිවේදනවලට අනුව නවගමුව, මරදන්කේණි සහ අගලවත්ත ප්රදේශවලින් මෙම ඝාතන වාර්තා වේ.
නවගමුව කොරතොටදී වෙඩි තැබීමක්: තරුණයෙක් මරුට
නවගමුව පොලිස් වසමේ කොරතොට ප්රදේශයේ නිවසක් තුළ සිටි පුද්ගලයින් තිදෙනෙකු ඉලක්ක කර ගනිමින් යතුරුපැදියකින් සහ ත්රීරෝද රථයකින් පැමිණි පිරිසක් වෙඩි ප්රහාරයක් එල්ල කර ඇත. පිස්තෝල වර්ගයේ ගිනි අවියකින් සිදුකළ මෙම ප්රහාරයෙන් බොරැල්ල ප්රදේශයේ පදිංචි 20 හැවිරිදි තරුණයෙකු එම ස්ථානයේදීම මියගිය අතර, තවත් දෙදෙනෙකු බරපතල තුවාල ලබා හෝමාගම රෝහලේ ප්රතිකාර ලබයි.
කෝවිල් භූමියක සහ නිවසක් තුළ මනුෂ්ය ඝාතන
- මරදන්කේණි: වත්තිරායන් ප්රදේශයේ කෝවිලක පූජාවකට සහභාගී වෙමින් සිටි 38 හැවිරිදි පුද්ගලයෙකු, ඇති වූ ආරවුලක් මත තියුණු ආයුධයකින් පහර දී ඝාතනය කර ඇත. මේ සම්බන්ධයෙන් 28 හැවිරිදි සැකකරුවෙකු අත්අඩංගුවට ගෙන තිබේ.
- අගලවත්ත: 84 හැවිරිදි වියපත් පුද්ගලයෙකු තම 79 හැවිරිදි බිරිඳ සමඟ ඇති වූ ආරවුලක් දුරදිග යාමෙන් දොර පොල්ලකින් පහර දී ඇයව ඝාතනය කර ඇත. සැකකාර සැමියා පොලිස් අත්අඩංගුවේ පසුවේ.
ගංජා කිලෝ 121ක් සහ පුරාවස්තු වැටලීම්
මහජන ආරක්ෂාව තහවුරු කිරීමේ මෙහෙයුම් අතරතුර, හම්බෙගමුව රක්ෂිත ප්රදේශයේදී ගංජා කිලෝග්රෑම් 121කට අධික ප්රමාණයක් සමඟ 47 හැවිරිදි සැකකරුවෙකු අත්අඩංගුවට ගැනීමට මත්ද්රව්ය නාශක කාර්යාංශය සමත් වී ඇත. මේ අතර, මිනුවන්ගොඩ ප්රදේශයේදී පුරාවස්තු සන්තකයේ තබාගෙන සිටි පිරිමියෙකු සහ කාන්තාවක ද පොලිස් දැලට හසුව තිබේ.
මහා මාර්ගයේ මරු කැඳවූ අනතුරු
වසරේ පළමු දිනයේදීම යතුරුපැදි අනතුරු තුනකින් පුද්ගලයින් තිදෙනෙකු ජීවිතක්ෂයට පත්ව ඇත.
- පුල්මුඩේ: යතුරුපැදිය ඇළකට පෙරළීමෙන් 64 හැවිරිදි පුද්ගලයෙක්.
- ඊච්චලම්පත්තුව: නවතා තිබූ ට්රැක්ටරයක ගැටීමෙන් 21 හැවිරිදි තරුණයෙක්.
- කොස්ගොඩ: ලොරි රථයක පසුපස ගැටීමෙන් 26 හැවිරිදි තරුණයෙක්.
මෙම සියලු සිදුවීම් සම්බන්ධයෙන් අදාළ ප්රදේශවල පොලිස් ස්ථාන මගින් වැඩිදුර විමර්ශන ක්රියාත්මක වේ.
