ඉන්දීය උප ජනාධිපති සී.පී. රාධා ක්‍රිශ්ණන් දිවයිනට

දෙදින නිල සංචාරයක් සඳහා ඉන්දීය උප ජනාධිපති සී.පී. රාධා ක්‍රිශ්ණන් මහතා ඇතුළු 49 දෙනෙකුගෙන් යුත් දූත පිරිසක් අද (19) දිවයිනට පැමිණියහ. ඉන්දීය ගුවන් සේවයට අයත් ‘INDIA – 01’ දරන විශේෂ ගුවන් යානයෙන් කටුනායක ගුවන් තොටුපොළ වෙත පැමිණි ඔවුන් පිළිගැනීම සඳහා ක්‍රීඩා අමාත්‍ය සුනිල් කුමාර ගමගේ මහතා ඇතුළු මැති ඇමතිවරුන් පිරිසක් ගුවන්තොටුපොළ අතිවිශේෂ අමුත්තන්ගේ මැදිරිය වෙත පැමිණ සිටියහ.

හෙට (20) දිනය දක්වා මෙරට රැඳී සිටින උප ජනාධිපතිවරයා, සිය සංචාරය අතරතුර ජනාධිපති අනුර කුමාර දිසානායක මහතා සහ අග්‍රාමාත්‍ය ආචාර්ය හරිනි අමරසූරිය මහත්මිය සමඟ ද්විපාර්ශ්වික සාකච්ඡා පැවැත්වීමට නියමිතය. මෙම සාකච්ඡා දෙරට අතර මෑතකදී ඇති වූ ඉහළ මට්ටමේ රාජ්‍යතාන්ත්‍රික සබඳතාවල තවත් එක් ඉදිරි පියවරක් ලෙස සැලකේ.

මීට අමතරව, දේශපාලන හා ප්‍රජා නායකයින් හමුවීමට නියමිත උප ජනාධිපතිවරයා, ‘දිට්වා’ සුළි කුණාටුවෙන් පසු සිදු කෙරෙන පුනරුත්ථාපන කටයුතු සහ සංවර්ධන ව්‍යාපෘති පිළිබඳවද අවධානය යොමු කරනු ඇත. මෙම සංචාරයේ විශේෂත්වයක් වන්නේ දෙරට අතර සහයෝගීතාව තවදුරටත් වර්ධනය කරගැනීම වෙනුවෙන් අවබෝධතා ගිවිසුම් කිහිපයකටම අත්සන් තැබීමට නියමිතව තිබීමයි.