2014 සහ 2015 වර්ෂවලදී විධිමත් ප්රසම්පාදන විධිවිධානවලට පටහැනිව සහල් ආනයනය කිරීම හේතුවෙන් ලංකා සතොස ලිමිටඩ් ආයතනයට රුපියල් 15,157,031,018 ක දැවැන්ත පාඩුවක් සිදුව ඇති බව පාර්ලිමේන්තුවේ පොදු ව්යාපාර පිළිබඳ කාරක සභාවේදී (COPE) අනාවරණය විය.
ලංකා සතොස ආයතනයේ 2021 සහ 2022 වර්ෂයන්ට අදාළ විගණකාධිපති වාර්තා සහ වත්මන් කාර්යසාධනය පරීක්ෂා කිරීම සඳහා කෝප් කමිටුව පාර්ලිමේන්තුවේදී රැස්වූ අවස්ථාවේදී මෙම තොරතුරු ඉදිරිපත් විය.
කාරක සභාව පෙන්වා දුන්නේ, 2014 සහ 2015 වර්ෂවලදී ආනයනික සහල් සඳහා රුපියල් 27,011,980,142ක පිරිවැයක් දරා තිබුණද, එම සහල් තොගය අලෙවියෙන් ලැබී ඇත්තේ රුපියල් 11,854,949,124 ක ආදායමක් පමණක් බවයි.
දේශීය සහල් වෙළෙඳපොළ තත්ත්වය, වී අස්වැන්න ලැබීම සහ සහල් ගබඩා කිරීමේ පහසුකම් පිළිබඳව නිසි අධ්යයනයක් සිදු නොකර විධිමත් ප්රසම්පාදන විධිවිධානවලට පටහැනිව සහල් ආනයනය කිරීමට කටයුතු කිරීම මෙම විශාල පාඩුවට හේතුව වී ඇත.
මෙම වංචනික ක්රියාව සම්බන්ධයෙන් විධිමත් පරීක්ෂණයක් සිදුකර ඇත්දැයි කෝප් කමිටුව නිලධාරීන්ගෙන් විමසූ විට, අපරාධ පරීක්ෂණ දෙපාර්තමේන්තුව විසින් නීතිපති දෙපාර්තමේන්තුවට චෝදනා ගොනුකරදීමට භාරදී ඇති බව නිලධාරීන් සඳහන් කළහ.
මීට අමතරව, සමාගමේ ගොඩනැගිලි කුලියට ගැනීමේදී මාර්ගෝපදේශ උල්ලංඝනය කරමින්, හිස් ඉඩම් සඳහා ඉදිකිරීම් සිදු නොකළ ගොඩනැගිලි හිමිකරුවන් 18 දෙනෙකුගෙන් සමාගමට අයවිය යුතු මුදල් තවමත් අයකරගෙන නොමැති බවද කෝප් කමිටුව පෙන්වා දී තිබේ.
2020 දෙසැම්බර් 31 වන විට, ගිවිසුම් 29ක් අනුව ගොඩනැගිලි ඉදිකිරීම් සඳහා අතිකාරම් (Advance Payments) මුදල් ලෙස රුපියල් 34,234,996ක ඇස්තමේන්තුවක් ලබා ගැනීමකින් තොරව ගෙවා ඇති බව අනාවරණය විය. එලෙස ඉදි කරන ලද ගොඩනැගිලිවලින් භාවිතයට සුදුසු පරිදි ඉදිකිරීම් සිදු නොකළ ආයතන හිමිකරුවන් 18 දෙනෙකුට එරෙහිව රුපියල් 27,435,000 ක් අයකර ගැනීමට සමාගම විසින් නඩු පවරා ඇති බව මෙහිදී වැඩිදුරටත් අනාවරණය විය.
