විධායක ජනාධිපති ක්රමය අහෝසි කර පාර්ලිමේන්තු ආණ්ඩු ක්රමයක් ස්ථාපිත කිරීමටත්, විධායක බලතල රහිත ජනාධිපතිවරයෙකු පත් කිරීමටත් අවශ්ය මූලික කටයුතු රජය විසින් ආරම්භ කර ඇති බව අග්රාමාත්ය ආචාර්ය හරිනි අමරසූරිය මහත්මිය පාර්ලිමේන්තුවේදී ප්රකාශ කළාය. විපක්ෂ නායක සජිත් ප්රේමදාස මහතා යොමු කළ ප්රශ්නයකට පිළිතුරු දෙමින් අග්රාමාත්යවරිය සඳහන් කළේ නව ආණ්ඩුක්රම ව්යවස්ථාවක් සම්පාදනය කිරීම හරහා මෙම වෙනස්කම් සිදු කිරීමට රජය අපේක්ෂා කරන බවයි.
රජයේ “පොහොසත් රටක් ලස්සන ජීවිතයක්” ප්රතිපත්ති ප්රකාශයට අනුව නව ව්යවස්ථාවක් කෙටුම්පත් කර එය මහජන සංවාදයකට ඉදිරිපත් කිරීමට නියමිතය. අනතුරුව අවශ්ය සංශෝධන සිදු කර ජනමත විචාරණයකින් එය සම්මත කර ගැනීම රජයේ ඉලක්කය වී තිබේ. මේ වන විට මීට පෙර පත් කරන ලද ව්යවස්ථා කමිටු වාර්තා සහ ප්රතිසංස්කරණ යෝජනා අධ්යයනය කරමින් පවතින බවත්, එහි මූලික සංකල්ප පත්රිකාව කඩිනමින් අමාත්ය මණ්ඩලයට ඉදිරිපත් කරන බවත් අග්රාමාත්යවරිය වැඩිදුරටත් කියා සිටියාය.
පළාත් සභා මැතිවරණය සම්බන්ධයෙන් අදහස් දැක්වූ අග්රාමාත්යවරිය, 2017 අංක 17 දරන සංශෝධන පනතේ පවතින නීතිමය ගැටලු හේතුවෙන් නතර වී ඇති එම මැතිවරණය හැකි ඉක්මනින් පැවැත්වීමට කටයුතු කරන බව පැවසුවාය. පවතින සීමා නිර්ණය කිරීමේ බාධාවන් ඉවත් කර මැතිවරණය පැවැත්වීම සඳහා වන ක්රමවේදය පිළිබඳව මේ වන විට අධ්යයනයක් සිදු කෙරේ. කෙසේ වෙතත්, 2026 වසරේ අයවැය මඟින් පළාත් සභා මැතිවරණය පැවැත්වීම සඳහා අවශ්ය ප්රතිපාදන වෙන් කර ඇති බව ද මෙහිදී අනාවරණය විය.
මීට අමතරව, ස්වාධීන අධිකරණ ක්රියාවලියක් ශක්තිමත් කිරීම උදෙසා “රජයේ අභිචෝදනාගාරය” ස්ථාපිත කිරීමට අවශ්ය නව නීති සහ සංශෝධන පිළිබඳව ද රජයේ අවධානය යොමුව පවතී. රටේ ප්රමුඛ ගැටලු විසඳන අතරම මෙම දේශපාලන ප්රතිසංස්කරණ සඳහා නිශ්චිත කාලවකවානු ඉදිරියේදී ප්රකාශයට පත් කරන බව ද අග්රාමාත්ය හරිනි අමරසූරිය මහත්මිය අවධාරණය කළාය.
