2024-25 වසරවල ඉන්දීය ටෙස්ට් කණ්ඩායම දැක්වූ දුර්වල ක්රීඩා විලාශය හමුවේ, ඉන්දීය ක්රිකට් පාලක මණ්ඩලය දැඩි නීති කිහිපයක් හඳුන්වා දීමට බලාපොරොත්තු වන බව වාර්තා වේ.
මේ දක්වා, ක්රීඩකයන්ගේ බිරින්දෑවරුන්ට දිගු සංචාරවලදී ක්රීඩකයන් සමග රැඳී සිටීමට නිදහස දී තිබුණ ද ඉන්දීය ක්රිකට් පාලක මණ්ඩලය ඒ සම්බන්ධව ද ඇතුළුව දැඩි වෙනස්කම් කිහිපයක් කිරීමට සූදානම් වේ.
වාර්තාවකට අනුව, ක්රීඩකයන් තම පවුල් සමඟ දිගු කාලයක් රැඳී සිටියහොත් විදේශ සංචාරවලදී ඔවුන්ගේ කාර්ය සාධනයට අහිතකර ලෙස බලපානු ඇතැයි ඉන්දීය ක්රිකට් පාලක මණ්ඩලය සිතයි.
එබැවින්, ක්රීඩකයන් පවුල් සමඟ ගතකරන කාලය සීමා කරමින්, 2019ට පෙර පැවති රීතියක් නැවත හඳුන්වා දීමට මණ්ඩලයට අවශ්ය වී ඇත.
‘ඩයිනික් ජග්රන්’ හි වාර්තාවකට අනුව, දින 45ක සංචාරයක් අතරතුර ක්රීඩකයන්ගේ පවුල්වලට හෝ බිරින්දෑවරුන්ට ක්රීඩකයන් සමඟ සති දෙකක් පමණක් රැඳී සිටීමට ඉන්දීය ක්රිකට් පාලක මණ්ඩලය අවසර දෙනු ඇත.
එපමණක් නොව, සෑම ක්රීඩකයකුටම සංචිතයේ අනෙකුත් සාමාජිකයන් සමඟ කණ්ඩායම් බස් රථයේ ගමන් කිරීමට සිදු වනු ඇත.
තනි තනිව ගමන් කිරීමද අධෛර්යමත් කරනු ඇත.
ක්රිකට් ක්රීඩකයන් දෙදෙනෙකුගේ වන භාර්යාවන් රිතිකා සජ්දේ සහ අතියා ෂෙට්ටි සමඟ බොහෝ විට සංචාරවල දක්නට ලැබෙන විරාත් කෝලිගේ බිරිඳ අනුෂ්කා ෂර්මාට ද තවදුරටත් තම ස්වාමිපුරුෂයා සමඟ සම්පූර්ණ සංචාරයට එක්වීමට නොහැකි විය හැකිය.
ඉන්දීය ක්රිකට් පාලක මණ්ඩලයේ ප්රධාන පුහුණුකරු ගෞතම් ගම්භීර් සහ ඔහුගේ කළමනාකරු ගෞරව් අරෝරාට එරෙහිව ද දැඩි චෝදනා එල්ල කර තිබේ.
ගම්භීර්ගේ කළමනාකරුට කණ්ඩායම් හෝටලයේ රැඳී සිටීමට හෝ ක්රීඩාංගණවල විශේෂ පුදගලන්ට වෙන්වූ කලාපයේ අසුන් ගැනීමට අවසර නැත.
කළමනාකරුට කණ්ඩායම් බස් රථයේ හෝ එහි පිටුපස බස් රථයේ ගම්භීර් සමඟ යෑමට අවසර නැත.
ගුවන් ගමන් අතරතුර, බර කිලෝග්රෑම් 150 ඉක්මවන්නේ නම් ක්රීඩකයන්ගේ ගමන් මලු සඳහා ගෙවීමෙන් මණ්ඩලය වැළකී සිටින බව ද වාර්තාවේ සඳහන් වේ.
ක්රීඩකයන්ට එම පිරිවැය තමන් විසින්ම දැරීමට සිදුවනු ඇත.
ඉන්දියාවේ ටෙස්ට් සහ එක්දින නායක රෝහිත් ෂර්මා, ප්රධාන පුහුණුකරු ගෞතම් ගම්භීර් සහ තේරීම් කමිටු ප්රධානී අජිත් අගාර්කර්, අලුතින් පත් කරන ලද ලේකම් සහ භාණ්ඩාගාරික ඇතුළු ඉන්දීය ක්රිකට් පාලක මණ්ඩලයේ ඉහළම ප්රධානීන් හමුවූ රැස්වීමකදී මෙම කරුණු සාකච්ඡා කළ බව වාර්තා වේ.
විරාත් කෝලි සහ රෝහිත් ඇතුළු ප්රවීණ තරුවල අනාගතය මෙන්ම ගම්භීර්ගේ පුහුණු කාර්ය මණ්ඩලයේ ධුර කාලය ද මෙම රැස්වීමේදී සාකච්ඡා කළ ප්රධාන මාතෘකා අතරට ඇතුළත් වී ඇත.
කණ්ඩායමේ සහායක කාර්ය මණ්ඩලයේ ධුර කාලය වසර තුනකට සීමා කළ යුතු බවට ද යෝජනා වී ඇත
