අම්බලන්තොට, මාමඩල දකුණ, බෝකුටුයාය ප්රදේශයේදී අතිශය කෲර අන්දමින් පුද්ගලයෙකු ඝාතනය කර තවත් අයෙකුට බරපතළ තුවාල සිදුකිරීමේ පුවතක් වාර්තා වේ. මෙම සිද්ධියෙන් ජීවිතක්ෂයට පත්ව ඇත්තේ වයස අවුරුදු 34ක් වන තිදරු පියෙකු වන අතර, ප්රහාරයෙන් තුවාල ලැබූ අනෙක් පුද්ගලයා මියගිය අයගේ බිරිඳගේ පියා බව අම්බලන්තොට පොලීසිය තහවුරු කර ඇත.
පොලිස් විමර්ශනවලට අනුව, පුද්ගලයින් තිදෙනෙකුගෙන් යුත් කණ්ඩායමක් ඝාතනයට ලක්වූ පුද්ගලයාගේ නිවසට පැමිණ මෙම ප්රහාරය එල්ල කර තිබේ. එහිදී ඔවුන් අදාළ පුද්ගලයා ඝාතනය කර ඔහුගේ හිස කඳින් වෙන් කොට, පසුව එම හිස මාමඩල මංසන්දියේ පිහිටි පිළිරුවක ගසා පලාගොස් ඇති බව අනාවරණය වී ඇත.
මෙම ඝාතනයට හේතුවී ඇත්තේ මීට පෙර අම්බලන්තොට, ඇලේගොඩ ප්රදේශයේ සිදුවූ ත්රිත්ව ඝාතනයකට සම්බන්ධ පළිගැනීමක් බව පොලීසිය සැක කරයි. ඝාතනයට ලක්වූ පුද්ගලයා එම ත්රිත්ව ඝාතන සිද්ධියේ සැකකරුවෙකු වන අතර, ඔහු රක්ෂිත බන්ධනාගාර ගතව සිට පසුගිය මාර්තු 30 වනදා ඇප මත නිදහස්ව පැමිණි අයෙකි.
සිද්ධිය වූ ස්ථානයේ තිබී ඝාතකයින් විසින් රැගෙන ආ මෙරට නිෂ්පාදිත ගිනිඅවියක් ද පොලීසිය විසින් සොයාගෙන ඇත. සැකකරුවන් අත්අඩංගුවට ගැනීම සඳහා අම්බලන්තොට පොලීසිය වැඩිදුර විමර්ශන ක්රියාත්මක කරනු ලබයි.
