ශ්රී ලංකාවේ ඩිජිටල් ක්ෂේත්රයේ නවෝත්පාදන ප්රවර්ධනය කිරීම සහ රාජ්ය සේවාවන් නවීකරණය කිරීම වෙනුවෙන් ඇමරිකානු ඩොලර් මිලියන 50ක මූල්ය ව්යාපෘතියක් සඳහා ලෝක බැංකුවේ අනුමැතිය හිමි වී තිබේ. මෙම ව්යාපෘතියේ ප්රධාන අරමුණ වන්නේ දැනට පවතින රාජ්ය සේවාවන් වඩාත් කාර්යක්ෂම සහ විනිවිදභාවයකින් යුත් ඩිජිටල් පද්ධතීන් බවට පරිවර්තනය කරමින් මහජනතාවට සමීප කරවීම බව ලෝක බැංකු සමූහය නිවේදනය කරයි.
මෙම ඩිජිටල් පරිවර්තන ව්යාපෘතිය යටතේ රජයේ සේවාවන් ලබා ගැනීම සඳහා ඒකාබද්ධ මාර්ගගත පුරවැසි සේවා ද්වාරයක් ස්ථාපිත කිරීමට නියමිතය. එමඟින් මහජනතාවට විවිධ රජයේ සේවාවන් එකම කවුළුවක් ඔස්සේ ලබා ගැනීමට අවස්ථාව හිමි වන අතර, රජයේ ආයතන අතර දත්ත ආරක්ෂිතව බෙදා ගැනීමට හැකි පද්ධතියක් ද මේ හරහා නිර්මාණය වේ. මෙය රජයේ කටයුතුවල කාර්යක්ෂමතාව ඉහළ නැංවීමට මෙන්ම කාලය සහ ශ්රමය ඉතිරි කර ගැනීමට ද මහඟු පිටුවහලක් වනු ඇත.
මීට අමතරව ඩිජිටල් ලේඛන සුරක්ෂිතව ගබඩා කිරීම සඳහා විශේෂිත ඩිජිටල් ගබඩා පද්ධතියක් සහ අවශ්යතාව පරිදි ව්යාප්ත කළ හැකි තාක්ෂණික වේදිකාවක් සකස් කිරීමට ද ලෝක බැංකු ආධාර ලැබෙනු ඇත. මෙම නවීන ඩිජිටල් විසඳුම් මඟින් රටේ ව්යාපාරික ක්ෂේත්රයේ වර්ධනයට මෙන්ම පොදු ජනතාවගේ දෛනික අවශ්යතා පහසුවෙන් ඉටු කර ගැනීමට අවශ්ය පසුබිම නිර්මාණය වන බව ලෝක බැංකුව පෙන්වා දෙයි.
