ඉන්දියාවේ සිට මෙරටට නීති විරෝධී අයුරින් බෝට්ටුවකින් රැගෙන එන ලද බීඩි කොළ මිටි 38ක් සහ හෙරොහින් ග්රෑම් 10ක් සමඟ සැකකරුවන් දෙදෙනකු වෙන්නප්පුව පොලිසිය විසින් අත්අඩංගුවට ගෙන තිබේ.
වෙන්නපුව පොලිසියට ලද තොරතුරක් මත කම්මල වැල්ලේ සිදුකරන ලද වැටලීමකදී මෙම අත්අඩංගුවට ගැනීම සිදු විය. වෙන්නප්පුව පොලිසිය සඳහන් කලේ අත්අඩංගුවට ගත් බීඩි කොළ තොගයේ වටිනාකම රුපියල් කෝටියක් පමණ වන බවයි. කෙසේවෙතත් මෙම සැකකරුවන් සතුව තිබී හෙරොයින් ග්රෑම් 10ක් ද සොයාගෙන ඇත.
වෙන්නපුව පොලිසිය සදහන් කලේ මොවුන් රුපියල් ලක්ෂ පහක මුදලක් අල්ලස් වශයෙන් ලබාදීමට තැත් කර ඇති අතර එම මුදල වැඩිදුර විමර්ශන සඳහා අල්ලස් හෝ දූෂණ චෝදනා විමර්ශන කොමිෂන් සභාව වෙත යොමු කිරීමට කටයුතු කරන බවයි.
හලාවත කොට්ඨාස භාර ජ්යෙෂ්ඨ පොලිස් අධිකාරී රොහාන් පෙරේරා ගේ උපදෙස් පරිදි වෙන්නප්පුව පොලිසියේ ස්ථානාධිපති තිළිණ හෙට්ටිආරච්චිගේ මූලිකත්වයෙන් සිද්ධිය සම්බන්ධයෙන් වැඩිදුර විමර්ශන සිදු කරනු ලබයි.
