යුධ සමයේදි ඝාතනයට ලක් වූ දෙමළ ඊලම් විමුක්ති කොටි සාමාජිකයන් විසි දහසකට අධික පිරිසකගේ නම් ඇතුළත් කරන ලද පලක මාලාවක් මහවිරු සතියේ තුන්වන දිනයේදී යාපනයේදී ජනසතු කර තිබේ .
උපවාසයේ යෙදී සිටියදී මිය ගිය එල්.ටී.ටී.ඊ සංවිධානයේ රාසයියා පාර්තිපන් හෙවත් ත්යාගී තිලීපන් සැමරීම සඳහා නල්ලුර් කන්දසාමි කෝවිල අසල ඉදිකර තිබු 2010 දී රජයේ ආරක්ෂක අංශ විසින් කඩා බිඳ දමන ලද තිලීපන්ගේ ස්මාරකය සමීපයේ නොවැම්බර් 23 වැනි සෙනසුරාදා පස්වරු හයට හිටපු එල්.ටී.ටී.ඊ සාමාජිකයන් 24379ගේ නම් ඇතුලත් පුවරු විවෘත කර තිබුනේ යුද පීඩිත දෙමළ මාතාවක් විසිනි.
1982 වසරේ නොවැම්බර් 27 සිට 2009 මැයි 18 දක්වා ඝාතනයට ලක් වු දෙමළ ඊලාම් විමුක්ති කොටි සාමාජිකයන්ගේ නම් පලක වල කොටා ඇති බව පවසන පළාත් බද වාර්තාකරුවන් සඳහන් කරන්නේ නාම පුවරු ප්රදර්ශනයේ ආරම්භක අවස්ථාවට යුද වින්දිත දෙමළ ජනයා ද එක්ව සිටි බවයි.
මිය ගිය එල්.ටී.ටී.ඊ සාමාජිකයන්ගේ නම් ඇතුලත් පුවරු නොවැම්බර් 27 වැනිදා දක්වා ප්රදර්ශනය කෙරෙන එම ස්ථානයේදී තම සමීපතමයන් සිහිකිරීමට ඔවුන්ගේ ඥාතීන්ට අවස්ථාව හිමි වන බව ද ඔවුහු වැඩි දුරටත් පවසති.
දෙමළ මහවිරුවන් අනුස්මරණය කිරීමේ සංවත්සරය යෙදී ඇත්තේ නොවැම්බර් 27 දාටය.
එල්.ටී.ටී.ඊ. පාලනය යටතේ පැවති දෙමළ ජනතාවගේ භූමි ප්රදේශ හමුදාව විසින් අත්පත් කර ගැනීමත් සමඟ, උතුරු සහ නැඟෙනහිර ප්රදේශවල මියගිය දෙමළ සටන්කාමීන්ගේ සොහොන් 20,400 ක් පමණ තිබූ සුසාන භූමි 25 කට ආසන්න ප්රමාණයක් ශ්රී ලංකා යුද හමුදාව විසින් ඩෝසර් කර සමරු පලක කඩා බිඳ දමා තිබෙන බව වාර්තා වේ .
මීට අමතරව හින්දු සංස්කෘතියේ කොටසක් වන මළවුන්ට ගෞරව දැක්වීම එක්සත් ජාතීන්ගේ සංවිධානය විසින් මූලික අයිතිවාසිකමක් ලෙස ද ප්රකාශයට පත් කර ඇත .
