ලංකා විදුලිබල මණ්ඩලය (CEB) විසින් ඉදිරිපත් කරන ලද 6.8% ක විදුලි ගාස්තු වැඩි කිරීමේ යෝජනාව පිළිබඳ අවසන් තීරණය, මහජන උපයෝගිතා කොමිෂන් සභාව විසින් තවත් සති දෙකක් ඇතුළත ප්රකාශයට පත් කිරීමට නියමිත බව වාර්තා වේ.
ගාස්තු සංශෝධන ක්රියාවලියේ අත්යවශ්ය අංගයක් වන මහජන අදහස් විමසීම මේ වන විට අවසන් අදියරට පැමිණ තිබේ. එහි අවසන් සැසිය ලෙස ඔක්තෝබර් 8 වැනිදා බස්නාහිර පළාතට අදාළ සැසිය පැවැත්වීමට නියමිතය. මෙම සැසියෙන් පසු විදුලිබල පනතට සහ අදාළ මිල සූත්රයට අනුව අවසාන තීන්දුව ගැනීමට කොමිෂන් සභාව සූදානම් වේ.
මෙම ගාස්තු ඉහළ නැංවීමට CEB හේතුවක් ලෙස දක්වන්නේ, 2025 ඔක්තෝබර් සිට දෙසැම්බර් දක්වා කාලය තුළ විදුලිබල මණ්ඩලයට රුපියල් කෝටි 1769ක මූල්ය හිඟයක් ඇති වනු ඇතැයි ඇස්තමේන්තු කර තිබීමයි. යෝජිත 6.8%ක ගාස්තු වැඩිවීම තුළින් මෙම ඇස්තමේන්තුගත හිඟය පියවා ගැනීමට CEB බලාපොරොත්තු වේ..
