මහජන ආරක්ෂක හා පාර්ලිමේන්තු කටයුතු අමාත්ය ආනන්ද විජේපාල මහතා ප්රකාශ කරන්නේ, කෙහෙල්බද්දර පද්මේ ඇතුළු අත්අඩංගුවට ගත් පාතාල කල්ලියෙන් සොයාගත් ජංගම දුරකථන 31ක් පදනම් කරගෙන පුළුල් විමර්ශන ආරම්භ කර ඇති බවයි. මෙම දුරකථන දත්ත විශ්ලේෂණය කිරීමෙන් අනතුරුව හෙළි වන තොරතුරු අධිකරණයට වාර්තා කිරීමට නියමිතය.
අමාත්යවරයාගේ අවධාරණය වන්නේ, මෙම ජංගම දුරකථන විමර්ශනවලදී පාතාල කල්ලි සාමාජිකයින් සමඟ සම්බන්ධකම් පැවැත්වූ ඕනෑම පුද්ගලයෙකුගේ තොරතුරු අනාවරණය වුවහොත්, ඔවුන්ගේ තරාතිරම නොබලා නීතිය ක්රියාත්මක කරන බවයි.
විශේෂයෙන්ම, දේශපාලඥයන් මෙම පාතාල ක්රියාකාරකම්වලට සම්බන්ධ වී ඇති බව ඔප්පු වුවහොත්, කිසිදු භේදයකින් තොරව නීතිය ක්රියාත්මක කරන බව ඇමති විජේපාල මහතා පෙන්වා දෙයි.
“මෙම විමර්ශන සිදුකරන විට යම් යම් දේශපාලඥයින් බියට පත් වී හෝ කලබල වී සිටිනවා නම්, ඔවුන් සමඟ යම්කිසි සම්බන්ධයක් පවත්ව ඇති බවට සාධාරණ සැකයක් මතුවනවා,” යනුවෙන් අමාත්යවරයා සඳහන් කළේය.
තවදුරටත් අදහස් දැක්වූ ආනන්ද විජේපාල මහතා සඳහන් කළේ, පාතාලයට සහ මත්කුඩු ජාවාරමට එරෙහිව නීතියේ සමානතාව තහවුරු කරන බවත්, මෙහිදී කිසිදු දේශපාලන පළිගැනීමක් සිදු නොකරන බවත්ය. රට පාතාලයෙන් සහ මත්ද්රව්යවලින් මුදා ගැනීම සඳහා පොලිසිය නීතියට අනුව කටයුතු කරන බවටද ඔහු සහතික විය.
