සමගි ජන බලවේගය (සජබ) සහ එක්සත් ජාතික පක්ෂය (එජාප) ඒකාබද්ධව වැඩ කළ හැකි ආකාරය පිළිබඳ යෝජනාවලියක් සකස් කිරීම සඳහා සිව් පුද්ගල කමිටුවක් පත් කර ඇති බව විපක්ෂයේ ප්රධාන සංවිධායක, සජබ පාර්ලිමේන්තු මන්ත්රි ගයන්ත කරුණාතිලක මහතා ‘ඉරිදා මව්බිම’ට පැවසීය.
කබීර් හෂීම්, එස්.එම්. මරික්කාර්, මුජිබුර් රහුමාන් සහ එරාන් වික්රමරත්න යන මන්ත්රීවරුන් මෙම කමිටුවට අයත් වෙති.
ගිය සතියේ රැස් වූ සමගි ජන බලවේගයේ කළමනාකරණ කමිටුවේ තීරණයක් අනුව මෙම කමිටුව පත් කර ඇති අතර, ඔවුන්ට පැවරී ඇති වගකීම වන්නේ එජාපය සමග එකට වැඩ කිරීමට හැකි ආකාරය පැහැදිලි කරන යෝජනාවලියක් සකස් කර සජබ නායකයා වෙත ලබා දීමයි. තවද, තම තමන්ගේ පක්ෂවල අනන්යතාව ආරක්ෂා කරගනිමින් ඒකාබද්ධව ඉදිරියට යන ආකාරය සෙවීම ද මෙම කමිටුව වෙත පැවරී තිබේ.
කළමනාකරණ කමිටුව ඒකමතිකව තීරණය කර ඇත්තේ, සමගි ජන බලවේගය ප්රධාන විපක්ෂය ලෙස මූලිකත්වයේ තබාගෙන එක්සත් ජාතික පක්ෂය සමඟ ඒකාබද්ධව කටයුතු කිරීමටයි. මෙම තීරණය පසුගිය බ්රහස්පතින්දා රැස් වූ කෘත්යාධිකාරී මණ්ඩලය විසින් ද ඒකමතිකව අනුමත කර ඇති බැවින්, එජාපය සමග සමගි ජන බලවේගයේ මූලිකත්වය ඇතිව එම වැඩකටයුතු ඉදිරියට ගෙන යෑම සිදුවනු ඇති බව ගයන්ත කරුණාතිලක මහතා වැඩිදුරටත් කියා සිටියේය.
