වෙන්නප්පුව ලුණුවිල ප්රදේශයේ සිදුවූ හෙලිකොප්ටර් අනතුර පිළිබඳ විමර්ශනය කිරීම සඳහා ගුවන් හමුදාවේ උසස් නිලධාරීන් ඇතුළු නව දෙනෙකුගෙන් සමන්විත කමිටුවක් පත් කර ඇති බව ගුවන් හමුදා මාධ්ය ප්රකාශක ගෲප් කැප්ටන් එරන්ද ගීගනගේ පවසයි.
මානුෂීය මෙහෙයුම්වල නිරතව සිටි ශ්රී ලංකා ගුවන් හමුදාවට අයත් බෙල් 212 වර්ගයේ හෙලිකොප්ටර් යානයක් ඊයේ (නොවැම්බර් 30) ලුණුවිල ප්රදේශයේදී අනතුරට පත් විය. යානය කඩා වැටෙන අවස්ථාවේදීත් ලුණුවිල පාලම අසල සිටි පිරිසකට ආහාර ද්රව්ය ඇතුළු උපකරණ ලබාදීමට සූදානමින් සිටියේය.
නියමුවන් යානය ආරක්ෂිත ගොඩබෑමකට උත්සාහ දරා තිබුණ ද, ඒ අතරතුර හෙලිකොප්ටරය ගිං ඔයට කඩා වැටී ඇත. යානයේ ගමන්ගත් ගුවන් නියමුවා ඇතුළු 5 දෙනා ප්රදේශවාසීන්ගේ සහායෙන් මුදාගෙන මාරවිල රෝහලට ඇතුළත් කළ ද, එක් නියමුවෙකු අවාසනාවන්ත ලෙස ජීවිතක්ෂයට පත් විය.
මෙලෙස මියගොස් ඇත්තේ වින්ග් කමාන්ඩර් නිර්මාල් සියඹලාපිටිය නමැති 41 හැවිරිදි ගුවන් හමුදා නිලධාරියෙකි. අත්දැකීම් බහුල ගුවන් නියමුවෙකු වූ ඔහුගේ අභාවය රටම කම්පාවට පත් කළ සිදුවීමක් බවට පත්ව ඇත.
තවද, මියගිය නිර්මාල් සියඹලාපිටිය කොළඹ විශ්වවිද්යාලයේ අන්තර්ජාතික සබඳතා විෂයේ ශාස්ත්රපති උපාධිය සම්පූර්ණ කර ඇති අතර, ඔහු සූදානම්ව සිට ඇත්තේ හෙට (දෙසැම්බර් 02) පැවැත්වෙන එම උපාධි ප්රදානෝත්සවය සඳහා සහභාගී වීමට බවට සංවේදී කරුණක් වාර්තා වේ.
