හදිසි ආපදා තත්ත්වයෙන් පීඩාවට පත් ජනතාවට සහන සැලසීම සඳහා වන පරිපූරක ඇස්තමේන්තුව සම්මත කර ගැනීමෙන් අනතුරුව, පාර්ලිමේන්තු මන්ත්රීවරුන්ට සහ එහි කාර්ය මණ්ඩලයට දීර්ඝ නිවාඩුවක් ලබා දීමට පියවර ගෙන තිබේ. ඒ අනුව පාර්ලිමේන්තු මන්ත්රීවරුන් සඳහා දින 17ක කාලයක් නිවාඩු හිමි වන අතර, සභාවේ කටයුතු යළි ආරම්භ වීමට නියමිතව ඇත්තේ ලබන වසරේ ජනවාරි මස 06 වනදාය.
ආපදා සහන කටයුතු සඳහා ඉදිරිපත් කළ පරිපූරක ඇස්තමේන්තුව පිළිබඳ විවාදය ඊයේ (19) දින පවත්වා එය අනුමත කර ගැනීමෙන් පසුව, ජනවාරි 06 වනදා පෙරවරු 9.30 දක්වා පාර්ලිමේන්තුව කල් තැබීමට තීරණය විය. මන්ත්රීවරුන්ට අමතරව පාර්ලිමේන්තු කාර්ය මණ්ඩලය සඳහා ද විශේෂ නිවාඩු දින කිහිපයක් අනුමත කර ඇති බව වාර්තා වේ.
කථානායකවරයාගේ අනුමැතිය පරිදි පාර්ලිමේන්තු කාර්ය මණ්ඩලය වෙනුවෙන් දෙසැම්බර් 22 සහ 23 යන දින දෙක විශේෂ නිවාඩු දින ලෙස ප්රකාශයට පත් කර ඇත. මීට පෙර දෙසැම්බර් 24 සහ 26 යන දෙදින ද නිවාඩු දින ලෙස ප්රකාශයට පත් කර තිබූ බැවින්, කාර්ය මණ්ඩලයට ද සැලකිය යුතු නිවාඩු කාලයක් හිමි වේ. මේ සම්බන්ධයෙන් වන විශේෂ චක්රලේඛයක් ද මේ වන විට නිකුත් කර තිබේ.
පාර්ලිමේන්තු කාර්ය මණ්ඩලය සිය නිවාඩු කාලයෙන් අනතුරුව දෙසැම්බර් 29 වන සඳුදා දින යළි රාජකාරි සඳහා වාර්තා කළ යුතු වුවද, පාර්ලිමේන්තු සභාවේ මීළඟ රැස්වීම ජනවාරි මස මුල් සතිය දක්වා පැවැත්වෙන්නේ නැත. මෙම නිවාඩු කාලය තුළ මන්ත්රීවරුන්ට සිය කොට්ඨාස මට්ටමින් සිදුවන ආපදා සහන කටයුතු පිළිබඳව සොයා බැලීමට අවස්ථාව හිමි වනු ඇත.
