සේවක අර්ධසාධක අරමුදල හෙවත් EPF සේවාවන් වඩාත් කාර්යක්ෂම සහ පහසු කිරීමේ අරමුණින් ක්රියාත්මක කෙරෙන ඩිජිටල්කරණ වැඩසටහන අද සිට නිල වශයෙන් ආරම්භ වේ. මෙම නව පද්ධතිය යටතේ සේවා යෝජක ආයතන සහ සාමාජිකයින් මාර්ගගත ක්රමය ඔස්සේ ලියාපදිංචි කිරීමේ අවස්ථාව උදා වන බව කම්කරු දෙපාර්තමේන්තුව නිවේදනය කරයි.
මෙහි සමාරම්භක උත්සවය අද පෙරවරු 9.00 ට කම්කරු අමාත්යාංශ පරිශ්රයේදී පැවැත්වීමට නියමිතව ඇත. කම්කරු අමාත්ය ආචාර්ය අනිල් ජයන්ත ප්රනාන්දු මහතාගේ ප්රධානත්වයෙන් පැවැත්වෙන මෙම අවස්ථාවට කම්කරු නියෝජ්ය අමාත්ය මහින්ද ජයසිංහ සහ අමාත්යාංශ ලේකම් එස්.එම්. පියතිස්ස යන මහත්වරුන් ඇතුළු රාජ්ය නිලධාරීන් පිරිසක් සහභාගී වීමට නියමිතය.
මෙතෙක් පැවති ලිපිගොනු පදනම් කරගත් ක්රියාවලිය වෙනුවට හඳුන්වා දෙන මෙම ඩිජිටල් පද්ධතිය හරහා සාමාජිකයින්ට තමන්ගේ තොරතුරු යාවත්කාලීන කර ගැනීමටත්, ආයතන ලියාපදිංචි කිරීමේ කටයුතු ප්රමාදයකින් තොරව නිවසේ හෝ කාර්යාලයේ සිටම සිදු කර ගැනීමටත් හැකියාව ලැබේ. මෙය ශ්රී ලංකාවේ රාජ්ය සේවය ඩිජිටල්කරණය කිරීමේ ගමනේ තීරණාත්මක පියවරක් ලෙස සැලකේ.
නව ක්රමය ක්රියාත්මක වීමත් සමඟ EPF සාමාජිකයින්ට සිය ගිණුම් පිළිබඳ තොරතුරු වඩාත් විනිවිදභාවයකින් යුතුව පරීක්ෂා කර ගැනීමට අවස්ථාව ලැබෙන අතර, රජයේ අපේක්ෂාව වන්නේ මෙමඟින් සේවාලාභීන්ට සිදුවන අනවශ්ය කාලය වැය වීම සහ පරිපාලනමය ගැටලු අවම කිරීමයි.
