රජයේ රස පරීක්ෂක දෙපාර්තමේන්තුවේ ගොඩගැසී ඇති කිලෝග්රෑම් එකට වඩා අඩු මත්ද්රව්ය සාම්පල ඉවත්කිරීමට අවශ්ය පියවර ගන්නා ලෙස අධිකරණ සේවා කොමිෂන් සභාව සියලු මහේස්ත්රාත්වරුන්ට දැනුම්දී තිබේ.
අධිකරණ සහ ජාතික ඒකාබද්ධතා අමාත්යාංශ ලේකම්, ජනාධිපති නීතිඥ අයේෂා ජිනසේන මහත්මිය විසින් සිදුකළ ඉල්ලීමකට අනුව මෙම දැනුම්දීම සිදුකර ඇති බව වාර්තා වේ.
1981 වර්ෂයේ සිට 2023 වර්ෂය දක්වා රජයේ රස පරීක්ෂක දෙපාර්තමේන්තුව වෙත යොමුකර ඇති අතර, පරීක්ෂණ කටයුතු අවසන් කර ඇති කිලෝ ග්රෑම් එකට අඩු මත්ද්රව්ය සාම්පල සම්බන්ධයෙන් වාර්තාවක් අධිකරණ අමාත්යාංශය විසින් අධිකරණ සේවා කොමිෂන් සභාව වෙත යොමුකර ඇත.
පරීක්ෂණ කටයුතු අවසන් වුව ද රඳවා තබාගෙන ඇති මෙම සාම්පල හේතුවෙන් රස පරීක්ෂක දෙපාර්තමේන්තුවේ ඉඩකඩ ප්රමාණවත් නොවීම මත ගබඩා පහසුකම් ලබාදීමට නොහැකි වී ඇති බව අමාත්යාංශය පෙන්වා දී තිබේ.
ඒ සම්බන්ධයෙන් කඩිනම් අවධානය යොමුකර පරීක්ෂණ අවසන් කර ඇති මත්ද්රව්ය සාම්පල රස පරීක්ෂක දෙපාර්තමේන්තුවෙන් ඉවත් කර ගැනීමට අවශ්ය කටයුතු සිදුකර දෙන ලෙස අධිකරණ අමාත්යාංශය විසින් අධිකරණ සේවා කොමිෂන් සභාවෙන් ඉල්ලීමක් කර තිබුණි.
එම ඉල්ලීම සලකා බැලූ අධිකරණ සේවා කොමිෂන් සභාව රජයේ රස පරීක්ෂක දෙපාර්තමේන්තුවේ ගොඩගැසී ඇති කිලෝග්රෑම් එකට අඩු මත්ද්රව්ය සාම්පල ඉවත් කරගැනීමට අවශ්ය පියවර ගන්නා ලෙස සියලු මහේස්ත්රාත්වරුන් වෙත ලිඛිතව දැනුම් දී ඇති බව වාර්තා වේ.
