මෙරට පිළිකා රෝහල් පද්ධතිය තුළ පවතින දැඩි ඖෂධ හිඟය සහ වෙළෙඳපොළේ ඇති ලියාපදිංචි නොකළ ඖෂධ පිළිබඳව සොයා බලන ලෙස ඉල්ලා අපරාධ පරීක්ෂණ දෙපාර්තමේන්තුවට (CID) අද (26) පැමිණිල්ලක් ඉදිරිපත් කෙරිණි. සමගි ජන බලවේගයේ පාර්ලිමේන්තු මන්ත්රී මුජිබර් රහුමාන් මහතා සහ ස්වාධීන වෘත්තීය සමිති එකමුතුවේ සම කැඳවුම්කරු වෛද්ය චමල් සංජීව මහතා විසින් මෙම පැමිණිල්ල ගොනු කරන ලදී.
මෙහිදී අදහස් දැක්වූ වෛද්ය චමල් සංජීව මහතා පෙන්වා දුන්නේ පිළිකා ඖෂධ වර්ග 40කට ආසන්න ප්රමාණයක තොග රෝහල් සතුව නොමැති බවයි. මේ හේතුවෙන් රෝගීන්ට ඉතා ඉහළ මිලක් ගෙවා බාහිරින් ඖෂධ ලබා ගැනීමට සිදුව ඇති අතර, එලෙස අලෙවි වන සමහර ඖෂධවල ගුණාත්මකභාවය පිළිබඳව බරපතළ සැකයක් පවතින බව ඔහු පැවසීය. ලියාපදිංචි නොකළ ඖෂධවල අඩංගු ද්රව්ය පිළිබඳව නිසි සහතිකයක් නොමැති වීම රෝගීන්ගේ ජීවිත අවදානමට ලක් කරන්නක් බව වෛද්යවරයා වැඩිදුරටත් අවධාරණය කළේය.
පාර්ලිමේන්තු මන්ත්රී මුජිබර් රහුමාන් මහතා මෙහිදී ප්රකාශ කළේ මෙරටට ගෙන්වන ඖෂධවල ගුණාත්මකභාවය සහ ඒවායේ ලියාපදිංචිය තහවුරු කිරීම රජය සතු සෘජු වගකීමක් බවයි. පවතින ඖෂධ මාෆියාව සහ රෝගී සත්කාරක සේවාවන්හි බිඳ වැටීම සම්බන්ධයෙන් වහාම විධිමත් පරීක්ෂණයක් පවත්වන ලෙස ඔවුන් අපරාධ පරීක්ෂණ දෙපාර්තමේන්තුවෙන් ඉල්ලා සිටියහ.
