2015 ජනාධිපතිවරණ සමයේ කැරම්බෝඩ් 14,000ක් සහ දාම් ලෑලි 11,000ක් නීතිවිරෝධී ලෙස මිලදී ගෙන ක්රීඩා සංගම් අතර බෙදාහැරීමෙන් රජයට රුපියල් මිලියන 53කට අධික පාඩුවක් සිදුකළ බවට චෝදනා ලැබ, වසර 20ක බරපතළ වැඩ සහිත සිර දඬුවම් නියම වී සිටින හිටපු අමාත්ය මහින්දානන්ද අලුත්ගමගේ මහතා, එම දඬුවමට එරෙහිව ශ්රේෂ්ඨාධිකරණයට අභියාචනයක් ඉදිරිපත් කර තිබේ.
නීතිඥ සනත් විජේවර්ධන මහතා මාර්ගයෙන් ගොනුකර ඇති මෙම අභියාචනය, ශ්රේෂ්ඨාධිකරණයට ඉදිරිපත් කිරීම සඳහා කොළඹ මහාධිකරණය වෙත භාර දී ඇත.
අභියාචක මහින්දානන්ද අලුත්ගමගේ මහතා සිය පෙත්සමෙන් කියා සිටින්නේ, අල්ලස් කොමිසම විසින් ගොනුකළ චෝදනාවලට තමන්ව වරදකරු කරමින් කොළඹ ත්රිපුද්ගල මහාධිකරණ විනිසුරු මඩුල්ලක් විසින් නියම කළ දඬුවම නීතියට පටහැනි බවයි. ත්රිපුද්ගල මහාධිකරණ විනිසුරු මඩුල්ල ඇතැම් කරුණු වැරදි ලෙස අර්ථකථනය කරමින් මෙම නඩු තීන්දුව ලබාදී ඇති බවත්, විත්තිය විසින් ඉදිරිපත් කළ ඇතැම් කාරණා නඩු තීන්දුව දීමේදී සැලකිල්ලට ගෙන නොමැති බවත් ඔහු පෙන්වා දෙයි.
ඒ අනුව, තමන්ට එරෙහිව පැනවූ දඬුවම බලරහිත කර, සියලු චෝදනාවලින් තමන්ව නිදොස් කොට නිදහස් කරන ලෙසට මහින්දානන්ද අලුත්ගමගේ මහතා ශ්රේෂ්ඨාධිකරණයෙන් ඉල්ලා තිබේ.
