ජාතික ජන බලවේගයේ පාර්ලිමේන්තු මන්ත්රී සහ හිටපු කථානායක අශෝක රන්වල මහතා සම්බන්ධ වූ රිය අනතුර පිළිබඳ විමර්ශනයකදී සපුගස්කන්ද පොලිස් ස්ථානයේ නිලධාරීන් පිරිසක් සිය රාජකාරිය නිසි පරිදි ඉටු කර නොමැති බව හෙළි වී තිබේ. පොලිස් මූලස්ථානය නිවේදනයක් නිකුත් කරමින් සඳහන් කරන්නේ පොලිස්පතිවරයාගේ නියමයෙන් සිදු කළ විශේෂ විමර්ශනයකදී මෙම කරුණු අනාවරණය වී ඇති බවයි.
මෙම අනතුර සිදුව ඇත්තේ ඉකුත් දෙසැම්බර් 11 වනදා සපුගස්කන්ද පොලිස් වසමේ දෙණිමුල්ල හන්දිය ආසන්නයේදීය. අශෝක රන්වල මහතා විසින් පදවන ලද ජීප් රථය යතුරුපැදියක සහ තවත් මෝටර් රථයක ගැටීමෙන් මෙම අනතුර සිදු විය. සිද්ධියෙන් පසු පොලිසිය කටයුතු කළ ආකාරය පිළිබඳව විමර්ශනය කිරීම සඳහා රථවාහන පාලන හා මාර්ග ආරක්ෂාව දිසාව භාර නියෝජ්ය පොලිස්පතිවරයා යටතේ පරීක්ෂණයක් පවත්වනු ලැබීය.
එම විමර්ශනයේදී අනාවරණය වී ඇත්තේ සපුගස්කන්ද පොලිස් ස්ථානාධිපතිවරයා මෙන්ම අනතුර සම්බන්ධයෙන් පරීක්ෂණ පැවැත්වූ රථවාහන අංශයේ ස්ථානාධිපති ඇතුළු නිලධාරීන් මෙම සිද්ධියේදී සිය රාජකාරි පැහැර හැර ඇති බවයි. එපමණක් නොව එම පොලිස් ස්ථානය අධීක්ෂණය කිරීමේ වගකීම දැරූ ජ්යෙෂ්ඨ රාජ්ය නිවේදිත නිලධාරීන් ද සිය වගකීම නිසි පරිදි ඉටු කර නොමැති බව එහිදී නිරීක්ෂණය වී තිබේ.
පවතින තත්ත්වය සැලකිල්ලට ගනිමින් අදාළ නිලධාරීන්ට එරෙහිව පොලිස් විශේෂ විමර්ශන ඒකකය මඟින් මූලික විමර්ශනයක් ආරම්භ කර විනය ක්රියාමාර්ග ගන්නා ලෙස පොලිස්පතිවරයා විසින් උපදෙස් ලබා දී ඇත. දේශපාලන ප්රභූන් සම්බන්ධ වන මෙවැනි සිදුවීම්වලදී නීතිය නිසි පරිදි ක්රියාත්මක කිරීම සහතික කිරීම සඳහා මෙම පියවර ගෙන ඇති බව පොලිස් ආරංචි මාර්ග පවසයි
