මීගමුව බන්ධනාගාරය තුළ පසුගිය දිනවල ඇති වූ ප්රචණ්ඩකාරී සිද්ධිය හේතුවෙන් පුද්ගලයින් 27 දෙනෙකුට වැඩි පිරිසක් ජීවිතක්ෂයට පත්වීම සහ 100කට අධික පිරිසක් තුවාල ලැබීම සම්බන්ධයෙන් එක්සත් ජාතීන්ගේ නේවාසික සම්බන්ධීකාරකවරයා සිය බලවත් කණගාටුව ප්රකාශ කර සිටියි.
මෙම ඛේදවාචකය සම්බන්ධයෙන් ශෝකය පළ කරන එක්සත් ජාතීන්ගේ සංවිධානය, මියගිය අයගේ පවුල් වෙත සිය බලවත් සංවේගය පළ කරන අතර තුවාල ලැබූවන් ඉක්මනින් සුවය ලබන ලෙස ප්රාර්ථනා කරයි. බන්ධනාගාර නිලධාරීන් මෙන්ම රැඳවියන් ද රාජ්යයේ රැකවරණය සහ ආරක්ෂාව යටතේ සිටින බැවින්, ඔවුන්ගේ ආරක්ෂාව සහතික කිරීම රජයක මූලික වගකීමක් බව එක්සත් ජාතීන් පෙන්වා දෙයි.
මෙම සිදුවීම මගින් ශ්රී ලංකාවේ බන්ධනාගාර පද්ධතිය තුළ පවතින අධික තදබදය, යල්පැන ගිය ක්රමවේද සහ දුර්වල පහසුකම් වැනි දිගුකාලීන ගැටලු සහ ඒ සඳහා අඛණ්ඩව ආයෝජනය කිරීමේ අවශ්යතාවය මනාව පැහැදිලි වන බව එම සංවිධානය වැඩිදුරටත් අවධාරණය කරයි. සිද්ධිය සම්බන්ධයෙන් විමර්ශනය කිරීමට රජය විසින් ස්වාධීන කමිටුවක් පත් කිරීම එක්සත් ජාතීන්ගේ සංවිධානය සාදරයෙන් පිළිගනී. මෙම කමිටුවේ සොයාගැනීම් බන්ධනාගාර පද්ධතියේ තිරසාර දියුණුවක් ඇති කිරීමට දායක වනු ඇතැයි ඔවුහු අපේක්ෂා කරති. බන්ධනාගාර ආරක්ෂාව ශක්තිමත් කිරීමටත්, රඳවා ගැනීමේ කොන්දේසි වැඩිදියුණු කිරීමටත් සහ බන්ධනාගාර නිලධාරීන්ගේ යහපැවැත්ම නංවාලීමටත් තාක්ෂණික සහයෝගීතාව හරහා ශ්රී ලංකාවට අඛණ්ඩව සහයෝගය ලබා දෙන බව එක්සත් ජාතීන් නැවතත් තහවුරු කර සිටියි.
පුවතකට එහා ලෝකයකට ඔබේ මනස විවර කරන සයිබර් අවකාශය>>>Island Voice
