ආගමන විගමන දෙපාර්තමේන්තුවේ මාර්ගගත වීසා නිකුත් කිරීමේ ක්රමවේදය සම්බන්ධයෙන් විගණකාධිපති දෙපාර්තමේන්තුව විසින් නිකුත් කරන ලද විශේෂ විගණන වාර්තාව මේ වන විට රට තුළ දැඩි ආන්දෝලනයකට තුඩු දී තිබේ. මෙම වාර්තාවේ නිරීක්ෂණ සම්බන්ධයෙන් ප්රතිචාර දක්වමින්, අදාළ වීසා සේවා සැපයීමේ ප්රධාන කොන්ත්රාත්කරු වන GBS Technology Services Pte Ltd සමාගම විසින් සීමිත නිවේදනයක් නිකුත් කර ඇත.
GBS Technology Services සමාගම සිංගප්පූරුවේ මූලස්ථානය කර ගත් අතර, එහි අනුබද්ධිත IVS Global FZCO (“IVS-GBS”) සමාගම ඩුබායි හි ලියාපදිංචි වී ඇත. 2023 දෙසැම්බර් 21 වන දින ශ්රී ලංකා ආගමන විගමන දෙපාර්තමේන්තුව සමඟ ඔවුන් ඇතුළු හවුල්කාර සමාගම් එක්ව ඊ-වීසා සහ ඒ ආශ්රිත සේවා සැපයීම සඳහා ගිවිසුමකට එළඹුණි. IVS-GBS මෙහි ප්රධාන කොන්ත්රාත්කරු ලෙස කටයුතු කරයි.
සමාගමේ ප්රධාන පැහැදිලි කිරීම
විගණකාධිපති වාර්තාවට ප්රතිචාර දක්වමින් සමාගම අවධාරණය කරන්නේ, ප්රධාන කොන්ත්රාත්කරු ලෙස තමන් ශ්රී ලංකා ආගමන විගමන දෙපාර්තමේන්තුව සමඟ එකඟ වී ඇත්තේ වීසා ආදායම් එකතු කර ඒවා දෙපාර්තමේන්තුව වෙත නිසි පරිදි භාර දීමට බවයි.
කෙසේ වෙතත්, මෙම කරුණ දැනට අධිකරණමය විභාගයට යටත්ව (sub judice) පවතින බැවින් මේ මොහොතේ සවිස්තරාත්මක ප්රකාශයක් නිකුත් නොකරන බව ඔවුහු පවසා සිටිති. අවශ්ය වූ විටකදී නිසි අධිකරණමය මණ්ඩල හමුවේ විස්තරාත්මක නිරූපණයන් සහ පැහැදිලි කිරීම් ඉදිරිපත් කිරීමට සූදානම් බවට සමාගම උපදෙස් ලබා දී ඇත.
විගණන වාර්තාවට විරෝධය
GBS සමාගම නිකුත් කළ නිවේදනයේ තවත් වැදගත් කරුණක් වූයේ, 2025 ඔක්තෝබර් 3 දිනැති විශේෂ විගණන වාර්තාවේ සොයාගැනීම් සිදුකර ඇත්තේ IVS-GBS සමාගමට තම පැහැදිලි කිරීම් ඉදිරිපත් කිරීමට අවස්ථාවක් ලබා නොදීමෙන් බවට කරන චෝදනාවයි.
“එවැනි අවස්ථාවක් ලබා දුන්නේ නම්, වාර්තාව සකස් කිරීම සඳහා විගණකාධිපති කාර්යාලයට උපකාර වන පරිදි අදාළ සාක්ෂි සහ පැහැදිලි කිරීම් ඉදිරිපත් කිරීමට අපට හැකිව තිබූ බවට අපි විශ්වාස කරමු.”
එම නිසා, වාර්තාවේ සඳහන් ඇතැම් නිරීක්ෂණ සම්බන්ධයෙන් පැහැදිලි කිරීම් ලබා දීම සඳහා විගණකාධිපති කාර්යාලය සමඟ සෘජුවම සම්බන්ධ වීමට IVS-GBS සමාගම අපේක්ෂා කරයි.
අවසාන වශයෙන්, ශ්රී ලංකා රජය සමඟ පවතින හවුල්කාරිත්වය අගය කරන බවත්, අදාළ බලධාරීන් සමඟ පූර්ණ විනිවිදභාවය, සහයෝගය සහ නීති රීතිවලට අනුකූල වීම පවත්වාගෙන යාමට තමන් කැපවී සිටින බවත් GBS සමාගම අවධාරණය කර සිටී. මෙමගින් පැහැදිලි වන්නේ, මතභේදයට තුඩු දී ඇති මෙම ගිවිසුම සම්බන්ධයෙන් පැහැදිලි කිරීම් ලබා දීමට සහ විගණන වාර්තාවේ ඇති අඩුපාඩු නිවැරදි කිරීමට සමාගම සූදානමින් සිටින බවයි.
