බූස්ස බන්ධනාගාරයේ රඳවා සිටින ප්රබල මත්ද්රව්ය ජාවාරම්කරුවන් සහ අපරාධකරුවන් සමඟ සමීප සබඳතා පැවැත්වූ බවට සැකකෙරෙන විපක්ෂයේ පාර්ලිමේන්තු මන්ත්රීවරයෙකු සම්බන්ධයෙන් අපරාධ පරීක්ෂණ දෙපාර්තමේන්තුව පුළුල් විමර්ශනයක් ආරම්භ කර තිබේ. මෙම සිද්ධියට අදාළව කරුණු විමසීම සඳහා අදාළ මන්ත්රීවරයා පොලිස් භාරයට කැඳවා ප්රකාශයක් සටහන් කර ගැනීමට ද පියවර ගෙන ඇත.
මීට මාස කිහිපයකට පෙර පොලිස් විශේෂ කාර්ය බළකාය විසින් බූස්ස බන්ධනාගාරයේ සිදුකළ විශේෂ මෙහෙයුමකදී රැඳවියන් සන්තකයේ තිබී ජංගම දුරකතන ඇතුළු උපකරණ තොගයක් සොයාගන්නා ලදී. එම දුරකතන සම්බන්ධයෙන් සිදුකළ විද්යාත්මක සහ තාක්ෂණික පරීක්ෂණවලදී එක් දුරකතන අංකයක් අදාළ මන්ත්රීවරයා පදිංචි ලිපිනය යටතේ ලියාපදිංචි වී ඇති බවට අනාවරණය වීමත් සමඟ මෙම විමර්ශන දැඩි වී තිබේ.
අපරාධ පරීක්ෂණ දෙපාර්තමේන්තුව විසින් සිදුකළ දුරකතන දත්ත විශ්ලේෂණවලදී හෙළි වී ඇත්තේ බන්ධනාගාරගතව සිටින ප්රබල අපරාධකරුවකු සහ මෙම දේශපාලනඥයා අතර තෙවන පාර්ශවයක් මාර්ගයෙන් සන්නිවේදන සබඳතා පවත්වා ඇති බවයි. බන්ධනාගාරය තුළ සිට මෙවැනි සබඳතා පැවැත්වීම මඟින් සැලසුම් කළ අපරාධ හෝ වෙනත් නීතිවිරෝධී කටයුතු පිළිබඳව මෙහිදී විශේෂ අවධානයක් යොමුව ඇත.
අපරාධ හා මූල්ය අපරාධ කොට්ඨාසය භාර ජ්යෙෂ්ඨ නියෝජ්ය පොලිස්පති අසංග කරවිට මහතාගේ සෘජු මඟපෙන්වීම යටතේ මෙම පරීක්ෂණ ක්රියාත්මක වේ. ඉදිරියේදී මෙම සිද්ධියට අදාළව තවත් පුද්ගලයින් කිහිපදෙනෙකුගෙන් ප්රශ්න කිරීමට නියමිත අතර අදාළ මන්ත්රීවරයාගේ ප්රකාශය මත පදනම්ව නීතිමය පියවර ගැනීමට පොලිසිය බලාපොරොත්තු වේ.
