සමාජ මාධ්ය භාවිතා කර සිදුකරන වංචා ඉහළ යාමක් පිළිබඳව ශ්රී ලංකා පරිගණක හදිසි ප්රතිචාර සංසදය (Sri Lanka CERT) විසින් මහජනතාවට අනතුරු ඇඟවීමක් කර තිබේ. පසුගිය සති කිහිපය පුරා සමාජ මාධ්ය වේදිකා හරහා මාර්ගගත වංචා සහ මුදල් වංචා කිරීමේ උත්සාහයන් වැඩිවීමක් දක්නට ලැබෙන බව එම සංසදය පෙන්වා දෙයි.
එළැඹෙන උත්සව සමය සහ දැනට පවතින කාලගුණික ආපදා තත්ත්වය උපයෝගී කර ගනිමින් සයිබර් අපරාධකරුවන් මහජන විශ්වාසය සහ අවදානම් තත්ත්වය අයුතු ලෙස යොදා ගෙන මුදල් ගසා කෑමේ උත්සාහයක නිරතව සිටින බව Sri Lanka CERT පෙන්වා දෙයි.
රාජ්ය ආයතන, දෙපාර්තමේන්තු, සුපිරි වෙළඳසැල් සහ ව්යාපාරික ආයතන ලෙස ව්යාජ ලෙස පෙනී සිටින වංචනිකයන් සම්බන්ධයෙන් සැලකිය යුතු පැමිණිලි සංඛ්යාවක් Sri Lanka CERT ආයතනය වෙත ලැබී තිබේ. මෙවැනි වංචාකාරී පුද්ගලයන්, ව්යාජ ප්රවර්ධන දීමනා, මූල්ය පාරිතෝෂික සහ න්යාග ලබා දෙන බවට තොරතුරු සමාජ මාධ්ය ඔස්සේ පළ කරමින් ජනතාව නොමඟ යවයි.
තවද, සුළි කුණාටුව සහ දරුණු වර්ෂාවෙන් පසුව, සයිබර් අපරාධකරුවෝ සහන සහ යළි ගොඩනැංවීමේ කටයුතුවල නියැලී සිටින රජයේ ආයතන සහ සංවිධානවල නම් වංචනික ලෙස අනුකරණය කරමින් සිටිති. ඔවුන් වංචාකාරී සබැඳි (Links) පළකරන අතර, මෙම සබැඳි හරහා මුදල් පරිත්යාග කිරීමට මහජනතාව පොළඹවන අයුරු නිරීක්ෂණය වී ඇත.
එහි ප්රතිඵලයක් ලෙස ඇතැම් පුද්ගලයන්ගේ බැංකු ගිණුම්වලට අනවසර පිවිසුම් සිදුකර එම ගිණුම් වංචාකරුවන් විසින් සිය ග්රහණයට නතු කර ගත් අවස්ථා ඇති බවත්, වින්දිතයින්ට ඔවුන්ගේ බැංකු ගිණුම්වල ඇති මුදල් එක එල්ලේම අහිමිව ගිය අවස්ථාද ඇති බව Sri Lanka CERT පෙන්වා දෙයි.
ඒ හේතුවෙන් අතිශයින්ම සුපරීක්ෂාකාරීව කටයුතු කරන ලෙස Sri Lanka CERT මහජනතාවගෙන් ඉල්ලා සිටී. ඔවුන් මහජනතාවට සිහිපත් කරන්නේ, සැක සහිත සබැඳි වෙත ප්රවේශ නොවන ලෙසත්, පුද්ගලික තොරතුරු බෙදා ගන්නා විට එය ආරක්ෂාකාරී ලෙස සිදු කරන ලෙසත්, එක් වරක් භාවිතා කළ හැකි මුරපද (OTP) කිසි විටෙකත් හෙළි නොකරන ලෙසත්ය. රාජ්ය ආයතන හෝ ස්ථාපිත සංවිධාන සමාජ මාධ්ය සටහන් හෝ මාර්ගගත සබැඳි හරහා මහජනතාවගේ සංවේදී තොරතුරු ඉල්ලා නොසිටින බවද ඔවුන් අවධාරණය කරයි.
