නත්තල් උත්සවය, පාසල් නිවාඩුව සහ වසර අවසානයේ එළඹෙන දීර්ඝ නිවාඩු සමය හේතුවෙන් මගී ජනතාවට සිදුවන අපහසුතා මඟහරවා ගැනීම සඳහා අමතර දුම්රිය සේවාවක් ක්රියාත්මක කිරීමට දුම්රිය දෙපාර්තමේන්තුව පියවර ගෙන තිබේ. උත්සව සමය තුළ ගම්බිම් බලා යන සහ විනෝද චාරිකාවල නිරත වන ජනතාවගේ පහසුව වෙනුවෙන් මෙම විශේෂ සැලසුම ක්රියාත්මක වේ.
ඒ අනුව, අද (24) පස්වරු 03.00 ට මරදාන දුම්රිය ස්ථානයෙන් ආරම්භ වී මාතර දක්වා ධාවනය වන විශේෂ ශීඝ්රගාමී දුම්රියක් යොදවා ඇත. මෙම විශේෂ දුම්රිය නැවත මෙම මස 29 වැනිදා අලුයම 05.00 ට මාතර දුම්රිය ස්ථානයෙන් පිටත්ව පෙරවරු 08.30 වන විට කොළඹ කොටුව දුම්රිය ස්ථානය වෙත ළඟා වීමට නියමිත බව දුම්රිය දෙපාර්තමේන්තුව සඳහන් කළේය.
මීට අමතරව, උතුරු දෙසට ගමන් කරන මගීන් වෙනුවෙන් කොළඹ කොටුව සහ කන්කසන්තුරය අතර ධාවනය වන නගරාන්තර දුම්රිය එළැඹෙන 25 වැනිදා සහ 28 වැනිදා යන දිනවල විශේෂයෙන් ධාවනය කිරීමට සැලසුම් කර ඇත. මෙම දුම්රිය සම්පූර්ණයෙන්ම පළමු පංතියේ වායු සමනය කළ මැදිරි 09 කින් සමන්විත වීම මගීන්ට වැඩි පහසුවක් ගෙන දෙනු ඇත.
දුම්රිය දෙපාර්තමේන්තුව වැඩිදුරටත් දන්වා සිටින්නේ පවතින උත්සව සමයේ තදබදය අවම කිරීම සඳහා අවශ්යතාවය අනුව තවත් විශේෂ දුම්රිය වාර එක් කිරීමට අවධානය යොමු කර ඇති බවයි.
