ශ්රී ලංකා වයස අවුරුදු 19 න් පහළ ජාතික ක්රිකට් කණ්ඩායමේ ප්රධාන පුහුණුකරු ලෙසින් හිටපු ටෙස්ට් ක්රීඩක චාමර සිල්වාව පත් කිරීමට ශ්රී ලංකා ක්රිකට් ආයතනය පියවරගෙන තිබේ. ශ්රී ලංකාව වෙනුවෙන් ටෙස්ට්, එක්දින සහ විස්සයි-20 තරග අංශ 3 ම නියෝජනය කර ඇති චාමර සිල්වා ජාත්යන්තර ක්රිකට් කවුන්සිලයේ තෙවැනි ශ්රේණිය සුදුසුකම් ලත් පුහුණුකරුවකු වේ.
මෙරට පළමු පෙළ ක්රිකට් ක්රීඩාව පිළිබඳව පුළුල් දැනුමක් මෙන්ම පුහුණු අත්දැකීම් ඇති චාමර සිල්වාගේ සේවා කාලය 2025 මාර්තු 01 වැනිදා සිට 2026 දෙසැම්බර් 31 වැනිදා තෙක් බලපැවැත්වෙනු ඇත.
අදාළ ධුරයේ වැඩකටයුතු භාර ගැනීමට පෙර චාමර පොලිස් ක්රීඩා සමාජයේ ප්රධාන පුහුණුකරු ලෙසද ඊට පෙර බ්ලූම්ෆීල්ඩ් සහ පානදුර යන ක්රීඩා සමාජාවල ප්රධාන පුහුණුකරු ලෙසින් කටයුතු කර තිබේ.
ශ්රී ලංකාව වෙනුවෙන් ටෙස්ට් තරග 11 ක් නියෝජනය කර ඇති දකුණත් පිතිකරුවා එක්දින තරග 75 ක් සහ විස්සයි-20 ජාත්යන්තර තරග 16 කදී ශ්රී ලංකාව නියෝජනය කර ඇත. එක්දින තරග අංශය යටතේ ඉන්දියාවට එරෙහිව වාර්තා කරන ලද ශතකයද සමග ජාත්යන්තර තරග දිවියේ ලකුණු 2269ක් රැස් කිරීමට සමත්ව සිටියි.
ශ්රී ලංකා වයස අවුරුදු 19 න් පහළ කණ්ඩායමේ දක්ෂතා වර්ධනය කිරීම මෙන්ම 2026 වසරේදී පැවැත්වීමට නියමිත අවුරුදු 19 න් පහළ යොවුන් ලෝක කුසලාන ක්රිකට් තරගාවලිය සඳහා කණ්ඩායම සූදානම් කිරීම චාමරගේ ප්රධාන වගකීම වී තිබේ.
