වසරක නිවාඩුව නිමා කරමින් 2026 අධ්යයන වර්ෂයේ පළමු පාසල් වාරයේ පළමු අදියර හෙට (05) සිට ආරම්භ කිරීමට සියලු කටයුතු සූදානම් කර ඇති බව අධ්යාපන අමාත්යාංශය නිවේදනය කරයි. ඒ අනුව දිවයින පුරා පිහිටි සියලුම රජයේ පාසල්, රජයේ අනුමත පෞද්ගලික පාසල් සහ පිරිවෙන්වල අධ්යයන කටයුතු හෙට පෙරවරුවේ සිට සුපුරුදු පරිදි ක්රියාත්මක වනු ඇත.
මෙම නව අධ්යයන වර්ෂයේ කාලසටහන සකස් කර ඇත්තේ පසුගිය දෙසැම්බර් මස 09 වනදා නිකුත් කරන ලද නිල චක්රලේඛයට අනුකූලවය. කොරෝනා වසංගතය සහ ඉන් පසු ඇති වූ විවිධ බාධාවන් හේතුවෙන් අතපසු වූ පාසල් වාර සහ විභාග කාලසටහන් යථා තත්ත්වයට පත් කිරීමේ වැඩපිළිවෙළ යටතේ මෙවර පාසල් වාරය නියමිත පරිදි ආරම්භ කිරීමට හැකි වීම සුවිශේෂී කරුණකි.
පසුගිය 2025 අධ්යයන වර්ෂයේ කටයුතු අවසන් කිරීමේදී සිංහල හා දෙමළ පාසල් සඳහා දෙසැම්බර් මස 22 වනදා ද, මුස්ලිම් පාසල් සඳහා දෙසැම්බර් මස 26 වනදා ද වාර අවසාන නිවාඩුව ලබා දීමට අධ්යාපන අමාත්යාංශය පියවර ගෙන තිබුණි. ඒ අනුව කෙටි නිවාඩුවකින් අනතුරුව ලක්ෂ සංඛ්යාත සිසුන් පිරිසක් හෙට දිනයේ සිය නව ශ්රේණිවල ඉගෙනුම් කටයුතු සඳහා පාසල් වෙත පැමිණීමට නියමිතය.
