2025 අ.පො.ස උසස් පෙළ විභාගයේ මෙතෙක් පවත්වා නොමැති විෂයයන්ට අදාළ විභාග කටයුතු එළඹෙන ජනවාරි මස 12 වනදා සිට 20 වනදා දක්වා පැවැත්වීමට තීරණය කර ඇති බව විභාග දෙපාර්තමේන්තුව විශේෂ නිවේදනයක් නිකුත් කරමින් සඳහන් කරයි. අයහපත් කාලගුණය ඇතුළු විවිධ හේතූන් මත මෙම විෂයයන්ට අදාළ විභාග කටයුතු මීට පෙර කල් දැමීමට සිදුවිය.
විභාගය නැවත ආරම්භ කිරීමට සමගාමීව, උසස් පෙළ විභාගයට අදාළ උපකාරක පන්ති පැවැත්වීම අද (06) මධ්යම රාත්රියේ සිට විභාගය අවසන් වන තෙක් සම්පූර්ණයෙන් තහනම් කර තිබේ. මෙම නියෝගය උල්ලංඝනය කරමින් කටයුතු කරන පුද්ගලයින්ට එරෙහිව දැඩි නීතිමය ක්රියාමාර්ග ගන්නා බව විභාග කොමසාරිස් ජනරාල්වරයා අවධාරණය කරයි.
ඒ අනුව, අදාළ කාලසීමාව තුළ විභාග අපේක්ෂකයින් ඉලක්ක කරගනිමින් උපකාරක පන්ති, දේශන, සම්මන්ත්රණ හෝ වැඩමුළු පැවැත්වීම මෙන්ම අනුමාන ප්රශ්න පත්ර මුද්රණය කර බෙදාහැරීම ද තහනම් වේ. තවද, විභාග ප්රශ්න පත්රවලට සමාන ප්රශ්න ලබාදෙන බව පවසමින් පෝස්ටර්, බැනර්, අත් පත්රිකා හෝ සමාජ මාධ්ය හරහා ප්රසිද්ධියක් ලබාදීම ද මෙම තහනමට ඇතුළත් කර තිබේ.
