රාජ්ය ආයතන විසින් ප්රදානය කරනු ලබන ආහාර ද්රව්ය ප්රසම්පාදනයන් යටතේ දුඹුරු සීනි පමණක් සපයා ගැනීම අනිවාර්ය කිරීමට කැබිනට් අනුමැතිය හිමිව ඇත.
දේශීය දුඹුරු සීනි කර්මාන්තය තිරසාරව සංවර්ධනය කිරීම සහ දේශීය උක් ගොවීන් රැකගැනීම මෙම තීරණයේ ප්රධාන අරමුණයි.
සීමා සහිත ලංකා සීනි (පුද්ගලික) සමාගම යටතේ ක්රියාත්මක වන පැලවත්ත හා සෙවනගල කර්මාන්ත ශාලා මඟින් වාර්ෂිකව දුඹුරු සීනි මෙට්රික් ටොන් 56,000 ක් පමණ නිෂ්පාදනය කරන අතර, උක් වගාවේ සාරවත් අස්වැන්න හේතුවෙන් මෙම වර්ෂයේ නිෂ්පාදනය එම සීමාව ඉක්මවා ගොස් තිබේ.
ගුණාත්මක භාවයෙන් ඉහළ දේශීය නිෂ්පාදනයක් වන දුඹුරු සීනි මෙරට ජනතාව තුළ තවදුරටත් ප්රචලිත කිරීම මඟින් දේශීය දුඹුරු සීනි කර්මාන්තය සංවර්ධනය කිරීමට රජයේ අවධානය යොමු වී ඇත. එමෙන්ම, මෙම කර්මාන්තය මත යැපෙන දේශීය උක් ගොවීන් සහ සේවකයන් රැකගැනීම පිණිස දේශීය වෙළෙඳ පොළ තුළ විකුණුම් අවස්ථා වැඩි කිරීමේ අවශ්යතාව ද හඳුනාගෙන තිබේ.
ත්රිවිධ හමුදාව, ශ්රී ලංකා පොලීසිය, බන්ධනාගාර දෙපාර්තමේන්තුව සහ රජයේ රෝහල් වැනි රාජ්ය ආයතන සඳහා ආහාර ද්රව්ය ප්රසම්පාදනයන් යටතේ සීනි සැපයීමේදී දුඹුරු සීනි පමණක් සපයා ගැනීම අනිවාර්ය කිරීමට තීරණය කර ඇත.
තවද, සීමා සහිත ලංකා සතොස විසින් සෘජුවම සීමාසහිත ලංකා සීනි (පුද්ගලික) සමාගමේ දුඹුරු සීනි මිල දී ගෙන පාරිභෝගිකයින්ට අලෙවි කිරීමටත් කර්මාන්ත සහ ව්යවසායකත්ව සංවර්ධන අමාත්යවරයා ඉදිරිපත් කළ යෝජනාව අමාත්ය මණ්ඩලය විසින් අනුමත කරන ලදී.
