අධිකරණ සේවා කොමිෂන් සභාව (JSC) විසින් අධිකරණ නිලධාරීන් වෙත දැනුම් දී ඇත්තේ, අධිකරණවල ගොඩගැසී ඇති නඩු භාණ්ඩ ලබන දෙසැම්බර් 31 වැනි දිනට පෙර නිශ්කාෂණය කළ යුතු බවයි. JSC හි ජ්යෙෂ්ඨ සහකාර ලේකම් ඩී.එම්.ජේ. දිසානායක මහතා චක්රලේඛයක් මගින් සියලුම මහාධිකරණ විනිසුරුවන් සහ අධිකරණ නිලධාරීන් වෙත මෙම උපදෙස් ලබා දී තිබේ.
මෙම නිශ්කාශන කටයුතු කඩිනම් කිරීම සඳහා විශේෂ අවසරයක් ලබා දී ඇති අතර, ඒ අනුව නිලධාරීන්ට අද සිට දෙසැම්බර් 31 වැනිදා දක්වා, සති අන්ත දිනවල හෝ රජයේ නිවාඩු දිනයක වුවද, කොමිෂන් සභාවෙන් නැවත අවසර ඇයැදීමකින් තොරව මෙම කටයුතුවල නිරත විය හැකිය.
නඩු භාණ්ඩ කාමරය හෝ ලේඛනාගාරය විවෘත කිරීම සඳහා අදාළ අධිකරණ මට්ටම අනුව නිශ්චිත අධීක්ෂණ ක්රමවේදයක් චක්රලේඛය මගින් හඳුන්වා දී ඇත.
මහාධිකරණයක නඩු භාණ්ඩ කාමරය හෝ ලේඛනාගාරය විවෘත කිරීම මහාධිකරණ විනිසුරු විසින් නම් කළ සුදුසු නිලධාරියෙකුගේ සෘජු අධීක්ෂණය යටතේ සිදුකළ යුතුය.
දිසා/මහේස්ත්රාත් අධිකරණයක නඩු භාණ්ඩ කාමරය හෝ ලේඛනාගාරය විවෘත කිරීම දිසා විනිසුරු, මහේස්ත්රාත්, අතිරේක දිසා විනිසුරු හෝ අතිරේක මහේස්ත්රාත්වරයෙකුගේ සෘජු අධීක්ෂණය යටතේ සිදුකළ යුතුය.
අධිකරණ කාර්යාලය විවෘත කිරීම රෙජිස්ට්රාර් හෝ නියෝජ්ය රෙජිස්ට්රාර්වරයාගේ සෘජු අධීක්ෂණය යටතේ සිදුකළ යුතු බවද මෙම චක්රලේඛයේ වැඩිදුරටත් සඳහන් වේ.
