කිලිනොච්චිය, ඩෙවිල්ස් තුඩුව වෙරළ ප්රදේශයේදී නාවික හමුදාව විසින් ඊයේ (ජූලි 12) සිදුකළ විශේෂ සෝදිසි මෙහෙයුමකදී, නීතිවිරෝධී ලෙස මෙරටට ගෙනවිත් ප්රවාහනය කිරීමට සූදානම් කර තිබූ කුළුබඩු, රූපලාවන්ය ද්රව්ය සහ ඖෂධ තොගයක් සමඟ සැකකරුවන් සිව්දෙනෙකු අත්අඩංගුවට ගෙන තිබේ.
උතුරු මැද නාවික විධානයට අයත් ශ්රී ලංකා නාවික නෞකා බුවනෙක ආයතනය විසින් කිලිනොච්චියේ ලොග්ගන්නාවාඩිය, ඩෙවිල්ස් තුඩුව වෙරළ ප්රදේශයේදී මෙම මෙහෙයුම දියත් කර ඇත. වෙරළ ආසන්නයේ තිබූ සැකකටයුතු කැබ් රථ දෙකක් පරීක්ෂා කිරීමේදී ඒවා තුළ අසුරා තිබූ මෙම නීතිවිරෝධී භාණ්ඩ තොගය සොයාගෙන තිබේ.
අත්අඩංගුවට ගත් භාණ්ඩ අතර එනසාල් කිලෝග්රෑම් 300ක්, කහ කුඩු කිලෝග්රෑම් 260ක්, වියළි ඉඟුරු කිලෝග්රෑම් 273ක් ඇතුළු කුළුබඩු තොගයක්, රූපලාවන්ය ද්රව්ය සහ ඖෂධ තොගයක් විය. නාවික හමුදාව විසින් එම කැබ් රථ දෙකද සිය භාරයට ගෙන ඇත.
අත්අඩංගුවට ගත් සැකකරුවන් වයස අවුරුදු 39ත් 49ත් අතර පසුවන එරක්කන්ඩි, කල්මුනෛකුඩි, ත්රිකුණාමලය සහ පුත්තලම යන ප්රදේශවල පදිංචිකරුවන් බව හඳුනාගෙන තිබේ. වැඩිදුර විමර්ශන කටයුතු සිදු කෙරේ.
