නුවරඑළිය ග්රෙගරි වැවට පසුගිය 07 වනදා කඩා වැටුණු පෞද්ගලික සමාගමකට අයත් සෙස්නා (Cessna) වර්ගයේ සැහැල්ලු ගුවන් යානය ගොඩගැනීමට ඊයේ (08) දින දරන ලද උත්සාහයන් අසාර්ථක වී තිබේ.
සිවිල් ගුවන් සේවා අධිකාරියේ අධ්යක්ෂ ජෙනරාල් සහ ප්රධාන විධායක නිලධාරී කපිතාන් දමින්ද රඹුක්වැල්ල මහතා සඳහන් කළේ, පවතින දුෂ්කරතා හේතුවෙන් යානය ගොඩගැනීම සඳහා වෘත්තීය කිමිදුම්කරුවන්ගේ (Master Divers) සහය ලබා ගැනීමට තීරණය කර ඇති බවයි.
සිවිල් ගුවන් සේවා අධිකාරිය, ගුවන් හමුදාව, නුවරඑළිය පොලිස් ජීවිත ආරක්ෂක බලකාය සහ ප්රදේශයේ බෝට්ටුකරුවන් එක්ව දැඩි අයහපත් කාලගුණය මධ්යයේ මෙහෙයුම් ක්රියාත්මක කළද, යානය වැවෙන් පිටතට ගැනීමට මෙතෙක් නොහැකි වී ඇත. අනතුර හේතුවෙන් ගුවන් යානයට දැඩි අලාභහානි සිදුවී ඇති බවද වාර්තා වේ.
මේ අතර, අනතුරින් තුවාල ලබා නුවරඑළිය දිස්ත්රික් මූලික රෝහලේ ප්රතිකාර ලබමින් සිටි ගුවන් නියමුවන් දෙදෙනා සුවය ලබා ඊයේ (08) රෝහලෙන් පිටව ගිය බව රෝහල් ආරංචි මාර්ග තහවුරු කළේය. සිද්ධිය සම්බන්ධයෙන් සිවිල් ගුවන් සේවා අධිකාරිය මගින් පූර්ණ විමර්ශනයක් ආරම්භ කර ඇත.
