දින කිහිපයක් තිස්සේ අතුරුදන්වී ඇතැයි වාර්තා වූ, මාරවිල ප්රදේශයේ ව්යාපාරිකයෙකුගේ මළසිරුර වෙන්නප්පුව ප්රදේශයේ කසළ වළකින් සොයාගෙන තිබෙනවා. මෙය ඝාතනයක් බවට පොලීසිය සැකකරන අතර, සිද්ධිය සම්බන්ධයෙන් ඔහුගේ මිතුරෙකු වෙන්නප්පුව පොලීසිය විසින් අත්අඩංගුවට ගෙන ඇත
මාරවිල, කටුනේරිය ප්රදේශයේ පදිංචි ශ්රීජිත් ජයෂන් නමැති 31 හැවිරිදි මෙම ව්යාපාරිකයා පසුගිය ජුනි 30 වනදා සිට අතුරුදන් බවට වෙන්නප්පුව පොලීසියට පැමිණිල්ලක් ලැබී තිබුණා. ඒ අනුව සිදුකළ විමර්ශනවලදී ඊයේ (ජූලි 3) පස්වරුවේ වෙන්නප්පුව ප්රදේශයේම ව්යාපාරිකයාගේ මිතුරෙකුගේ නිවසක තිබී අතුරුදන්වූ ව්යාපාරිකයාගේ මෝටර් රථය හමුවී තිබෙනවා.
පසුව එම මිතුරාගෙන් සිදුකළ ප්රශ්න කිරීම්වලදී, වෙන්නප්පුව සිරිගම්පොල ප්රදේශයේ පෞද්ගලික ආයතනයක කසළ වළක තිබී අතුරුදන් ව්යාපාරිකයාගේ මළසිරුර සොයාගෙන ඇත.
පොලීසිය පැවසුවේ, පසුගිය ජුනි 30 වනදා රාත්රියේ ව්යාපාරිකයා, ඔහුගේ මිතුරන් 5 දෙනෙකු සමඟ මත්පැන් පානය කර ඇති බවයි. එහිදී ඇතිවූ බහින්බස්වීමකදී ව්යාපාරිකයාට පිහියකින් ඇන ඝාතනය කර කසළ වළට දමා ඇති බවට තොරතුරු අනාවරණය වී තිබෙනවා.
සිද්ධිය සම්බන්ධයෙන් අත්අඩංගුවට ගත් සැකකරුවෙකු මාරවිල මහේස්ත්රාත් අධිකරණයට ඉදිරිපත් කිරීමට නියමිත අතර, මෙම ඝාතනයට සම්බන්ධ සෙසු සැකකරුවන් අත්අඩංගුවට ගැනීම සඳහා විමර්ශන ක්රියාත්මකය
