දශක කිහිපයක් පුරා ක්රියාත්මක වූ පැරණි ත්රස්තවාදය වැළැක්වීමේ පනත වෙනුවට නව පනත් කෙටුම්පතක් හඳුන්වා දීමට රජය පියවර ගෙන තිබේ. අධිකරණ සහ ජාතික ඒකාබද්ධතා අමාත්යාංශය මඟින් සකස් කරන ලද මෙම නව පනත් කෙටුම්පත මේ වන විට අධිකරණ අමාත්යාංශයේ නිල වෙබ් අඩවියේ ප්රසිද්ධියට පත් කර ඇති බව එම අමාත්යාංශය සඳහන් කරයි.
මහජනතාවට සහ උනන්දුවක් දක්වන පාර්ශවයන්ට මෙම කෙටුම්පත අධ්යයනය කිරීම සඳහා පහසුකම් සලසමින් එය සිංහල, දෙමළ සහ ඉංග්රීසි යන භාෂා ත්රිත්වයෙන්ම ප්රකාශයට පත් කර තිබේ. ජාත්යන්තර ප්රමිතීන්ට අනුකූලව සහ වර්තමාන අවශ්යතාවලට සරිලන පරිදි මෙම නව නීතිමය රාමුව සකස් කර ඇති බව අධිකරණ අමාත්යාංශ ආරංචි මාර්ග පවසයි.
අධිකරණ අමාත්ය නීතිඥ හර්ෂණ නානායක්කාර මහතා ප්රකාශ කළේ මෙම නව පනත් කෙටුම්පත සම්බන්ධයෙන් මහජනතාවට පවතින අදහස් සහ යෝජනා ඉදිරිපත් කිරීමට අවස්ථාව ලබා දී ඇති බවයි. ඒ අනුව 2026 පෙබරවාරි 28 වන දිනට පෙර තමන්ගේ යෝජනා ලිඛිතව හෝ විද්යුත් තැපෑල හරහා අමාත්යාංශය වෙත යොමු කරන ලෙස අමාත්යවරයා වැඩිදුරටත් ඉල්ලා සිටියි.
ලේකම්, අධිකරණ සහ ජාතික ඒකාබද්ධතා අමාත්යාංශය, අංක 19, ශ්රී සංඝරාජ මාවත, කොළඹ 10 යන ලිපිනයට හෝ secretary@moj.gov.lk යන විද්යුත් ලිපිනයට අදාළ යෝජනා යොමු කළ හැකිය. මහජන අදහස් විමසීමෙන් අනතුරුව අවශ්ය සංශෝධන සිදු කර පනත් කෙටුම්පත පාර්ලිමේන්තුවට ඉදිරිපත් කිරීමට රජය බලාපොරොත්තු වේ.
