විදේශගතව සිට මෙරටට පැමිණෙන ශ්රී ලාංකික පුරවැසියන්ට සහ ද්විත්ව පුරවැසිභාවය හිමි පුද්ගලයන්ට කටුනායක බණ්ඩාරනායක ජාත්යන්තර ගුවන්තොටුපළේදීම තාවකාලික රියදුරු බලපත්ර ලබා දීමට මෝටර් රථ ප්රවාහන දෙපාර්තමේන්තුව නව තීරණයක් ගෙන තිබේ. මෙමගින් නිවාඩුව සඳහා මෙරටට පැමිණෙන ලාංකිකයන්ට රියදුරු බලපත්ර ලබා ගැනීමට කාර්යාල වෙත ගොස් පෝලිම්වල රැඳී සිටීමට සිදුවන අපහසුතාව මඟහැරෙනු ඇත.
මෙම පහසුකම යටතේ ඔවුන් විදේශ රටකදී ලබාගෙන දැනට භාවිත කරනු ලබන වලංගු රියදුරු බලපත්රය පදනම් කර ගනිමින් ශ්රී ලංකාව තුළ වාහන ධාවනය සඳහා අවශ්ය වන තාවකාලික බලපත්රය නිකුත් කරනු ලැබේ. මෝටර් රථ ප්රවාහන දෙපාර්තමේන්තුව සඳහන් කරන්නේ ගුවන්තොටුපළ පරිශ්රය තුළ දැනටමත් ස්ථාපිත කර ඇති විශේෂ කවුළුව හරහා මෙම සේවාව කඩිනමින් ලබා ගත හැකි බවයි.
කටුනායක ගුවන්තොටුපළේ පිහිටි මෙම කවුළුව මගින් පසුගිය අගෝස්තු මස 03 වැනිදා සිට මෙරටට පැමිණෙන විදේශීය සංචාරකයන් සඳහා තාවකාලික රියදුරු බලපත්ර නිකුත් කිරීමේ කටයුතු සාර්ථකව සිදු කරමින් පවතී. එම සේවාව තවදුරටත් පුළුල් කරමින් විදේශගතව සිට පැමිණෙන මෙරට වැසියන්ට ද එම අවස්ථාව ලබා දීමට බලධාරීන් පියවර ගෙන ඇත්තේ ඔවුන්ගෙන් ලැබුණු දිගින් දිගටම ලැබුණු ඉල්ලීම්වලට ප්රතිචාර දක්වමිනි.
මෙම නව ක්රමවේදය හරහා සංචාරක ක්ෂේත්රයේ ප්රවර්ධනයක් මෙන්ම විදේශගත ලාංකිකයන්ට සිය මව්බිම තුළ ගත කරන කාලය වඩාත් ඵලදායී ලෙස භාවිත කිරීමට අවස්ථාව සැලසේ. විශේෂයෙන්ම උත්සව සමයේ මෙරටට පැමිණෙන පිරිසට මෙය මහඟු සහනයක් වනු ඇතැයි අපේක්ෂා කෙරේ.
