පාර්ලිමේන්තු මන්ත්රී නාමල් රාජපක්ෂගේ විවාහ උත්සවය සඳහා භාවිතා කළ විදුලිය වෙනුවෙන් ගෙවිය යුතු රුපියල් මිලියන දෙකට අධික ගාස්තුව නියමිත වේලාවට නොගෙවීම නිසා මහජනතාවගේ මූලික අයිතිවාසිකම් උල්ලංඝනය වී ඇති බව පවසමින් ගොනු කර ඇති මූලික අයිතිවාසිකම් පෙත්සමක් විභාගයට ගැනීමට ශ්රේෂ්ඨාධිකරණය අද (11) අවසර දී ඇත.
අදාළ පෙත්සම අග විනිසුරු ප්රීති පද්මන් සූරසේන සහ විනිසුරු අචල වෙංගප්පුලි යන මඩුල්ල හමුවේ කැඳ වූ අවස්ථාවේදී, නාමල් රාජපක්ෂගේ විවාහය සඳහා සපයනු ලැබූ විදුලිය වෙනුවෙන් ගෙවිය යුතු මුදල නියමිත වේලාවට ලංකා විදුලිබල මණ්ඩලයට නොගෙ වූ බව පෙත්සම්කාර පාර්ශ්වය නීතිඥ තිෂ්ය වේරගොඩ මගින් අධිකරණය හමුවේ ඉදිරිපත් කරන ලදී.
නීතිඥවරයා වැඩිදුරටත් සදහන් කළේ, අදාළ ගාස්තුව මේ වනවිට ගෙවා අවසන් කර ඇති බැවින්, මෙම ක්රියාව තුළින් මහජනතාවගේ මූලික අයිතිවාසිකම් උල්ලංඝනය වී ඇති බව පිළිබඳව අධිකරණයෙන් ප්රකාශයක් ලබා ගැනීම පමණක් තමන් අපේක්ෂා කරන බවයි.
වගඋත්තරකරුවන් වෙනුවෙන් පෙනී සිටි නීතිඥවරුද, විදුලි ගාස්තුව මේ වනවිට ගෙවා අවසන් කර ඇති බව අධිකරණය හමුවේ තහවුරු කළහ.
එමගින් දෙපාර්ශ්වය ඉදිරිපත් කළ කරුණු සලකා බැලූ විනිසුරු මඩුල්ල විසින් පෙත්සම විභාගයට ගැනීමට අවසර ලබා දුන්නේය.
නීතිඥ විජිත කුමාර විසින් ගොනු කළ මෙම පෙත්සමේ වගඋත්තරකරුවන් ලෙස ලංකා විදුලිබල මණ්ඩලය ඇතුළු පිරිසක් නම් කර ඇත.
පෙත්සම්කරුගේ මතය අනුව, සාමාන්ය ජනතාවගේ විදුලි බිල් කුඩා මුදල් පවා නියමිත වේලාවට ගෙවී නොතිබූ විට විදුලිය විසන්ධි කරන විදුලිබල මණ්ඩලය, මෙතරම් විශාල මුදලක් නියමිත වේලාවට අයකර ගැනීමට කටයුතු නොකිරීම මහජන අයිතිවාසිකම් උල්ලංඝනය වන තත්ත්වයක් බවට අධිකරණ තීන්දුවක් ලබාදෙන ලෙස ඉල්ලා සිටී.
