ආපදා හේතුවෙන් අවතැන් වී සහන කඳවුරුවල දැනට සිටින 7,000කට ආසන්න පුද්ගලයින් ප්රමාණයක් මාස 2ක් හෝ 3ක් ඇතුළත නැවත පදිංචි කරවීමට පියවර ගන්නා බව අත්යවශ්ය සේවා කොමසාරිස් ජනරාල් ප්රභාත් චන්ද්රකීර්ති මහතා පවසයි.
සම්පූර්ණයෙන්ම විනාශ වූ නිවාස 6,138ක් පවතින අතර, ඊට අදාළ පුද්ගලයින් යළි පදිංචි කරවීමට යම් කාලයක් ගතවනු ඇති බවද ඒ මහතා වැඩිදුරටත් පැවසීය. මාධ්ය සාකච්ඡාවකට එක්වෙමින් අත්යවශ්ය සේවා කොමසාරිස් ජනරාල්වරයා අද (දෙසැම්බර් 14) මේ බව සඳහන් කර සිටියේය.
ගොඩනැගිලි පර්යේෂණ ආයතනයේ දත්ත මත පදනම්ව, අර්ධ හානි සිදු වූ නිවාසවල අවදානමක් නොමැති නම් ඔවුන් යළි තම නිවාසවල පදිංචි කරවීමේ කටයුතු කඩිනම් කරන බවද ප්රභාත් චන්ද්රකීර්ති මහතා පැවසුවේය.
ප්රධාන වශයෙන් ඇති අභියෝගය වන්නේ සම්පූර්ණයෙන් නිවාස හානි සිදු වූ අය පදිංචි කරවීම බවත්, ඒ සඳහා රජය ගෙන යන විශේෂ වැඩපිළිවෙල කඩිනමින් ක්රියාත්මක කරවීමට සැලසුම් කර ඇති බවත් ඒ මහතා සඳහන් කළේය. ඉඩම් ආපදාවට ලක්වූවන් පදිංචි කරවීම සඳහා රජයේ ඉඩම් පිළිබඳව තොරතුරු ලබා දෙන ලෙස සියලුම දිස්ත්රික් ලේකම්වරුන් දැනුවත් කර ඇති බවද ඔහු වැඩිදුරටත් පැවසීය.
සුරක්ෂිත කඳවුරු ක්රියාත්මක වන පාසල් සහ තවදුරටත් අවදානම් සහිත පාසල් හැර අනෙකුත් සියලුම පාසල් දෙසැම්බර් මස 16 වැනිදා ආරම්භ කරන බවද කොමසාරිස් ජනරාල්වරයා මෙහිදී සඳහන් කර සිටියේය.
සහනාධාර බෙදාදීමේ දී හෝ අත්යවශ්ය සේවා නොලැබීම සම්බන්ධයෙන් මහජනතාවට යම් ගැටලුවක් ඇත්නම් ‘1904’ දුරකතන අංකය ඔස්සේ දැනුවත් කිරීම් සිදු කළ හැකි බවද ඔහු පැවසීය.
