අලුත්කඩේ අධිකරණ සංකීර්ණය තුළදී ගනේමුල්ල සංජීව නමැති සංවිධානාත්මක අපරාධකරුට වෙඩි තබා ඝාතනය කිරීමේ සිද්ධියට අදාළව අත්අඩංගුවට ගෙන දින 90ක රැඳවුම් නියෝග මත රඳවා සිටින සැකකාරියක් වන නන්ද කුමාර් තක්ෂි නමැති අය සමග සමීප සබඳතා පැවැත්වූ පොලිස් සැරයන්වරයෙකුගේ වැඩ තහනමට ලක් කර තිබේ.
අදාළ සැරයන්වරයා සැකකාරිය සමග එක බිස්කට් එක දෙකට කඩාගෙන කා, හස්ත සංඥා මාර්ගයෙන් අදහස් හුවමාරු කරගෙන ඇති බවට අනාවරණය වී ඇතැයි පොලීසිය පවසයි. CCTV කැමරා සමීප රූප පරීක්ෂා කිරීමේදී, සැරයන්වරයා අංක 03 සිර මැදිරියේ රඳවා සිටින නන්ද කුමාර් තක්ෂිට බිස්කට් ලබා දෙන බවත්, ඇය විසින් අඩක් ආහාරයට ගන්නා ලද බිස්කට් කැබැල්ලක් නිලධාරියාට ලබා දී ඇති බවත් අනාවරණය වී තිබේ.
ඉකුත් පෙබරවාරි මස 19 වනදා අලුත්කඩේ අධිකරණ සංකීර්ණය තුළදී ගනේමුල්ල සංජීව නමැති සංවිධානාත්මක අපරාධකරුට වෙඩි තබා ඝාතනය කිරීමේ සිද්ධියේ ප්රධාන සැකකාරිය වූ ඉෂාරා සෙව්වන්දි සහ ඇයගේ රුවට බොහෝ සෙයින් සමාන රුවක් ඇති මෙම සැකකාරිය වන නන්ද කුමාර් තක්ෂි ඇතුළු සැකකරුවන් හයදෙනෙකු නේපාලයේ කත්මන්ඩු නුවර නිවසක සැඟව සිටියදී අත්අඩංගුවට ගෙන පසුව දිවයිනට රැගෙන එනු ලැබීය.
ඉෂාරා සෙව්වන්දි සහ නන්ද කුමාර් තක්ෂි යන සැකකාරියන් දෙදෙනා මේ වන විට දින 90ක රැඳවුම් නියෝග මත කොළඹ දිසා අපරාධ කොට්ඨාසයේ රඳවා සිටියි. සිද්ධිය සම්බන්ධයෙන් කොළඹ දිසා අපරාධ කොට්ඨාසය වැඩිදුර පරීක්ෂණ පවත්වයි.
