මාලඹේ පිට්ටුගල කහන්තොට පාර ෆැන්ටසි ඇවනිව් හි දෙමහල් නිවසක ශීතාගාර තුළ පවත්වාගෙන ගිය කුෂ් නැමැති මත්ද්රව්ය නිෂ්පාදනාගාරයක් වටලා දෙදෙනෙකු අත්අඩංගුවට ගැනීමට බස්නාහිර දකුණ අපරාධ කොට්ඨාසය සමත්ව තිබෙනවා.
නිවසෙහි පහත මාලයේ කාමරයක් වායුසමීකරණය කර එහි තට්ටු කිහිපයකට රෝපණය කර තිබූ කුෂ් පැළ 60කට ආසන්න ප්රමාණයක් සහ එම නිවසේ ඉහළ මහලේ ශීතාගාරයක් තුළ පවත්වාගෙන ගිය තවත් කුෂ් පැළ සියයකට වැඩි ප්රමාණයක් සොයා ගැනීමට ඔවුන් සමත්ව ඇති බව සඳහන්.
තේ ඇසුරුම් කිරීමේ ආයතනයක් පවත්වාගෙන යන මුවාවෙන් ඉතා රහසිගතව මෙම කුෂ් මත්ද්රව්ය නිෂ්පාදනාගාරය පවත්වාගෙන ගොස් තිබෙන බව අනාවරණය වී තිබෙනවා.ඒ සඳහා අවශ්ය සියලුම දෑ විදේශයෙන් ආනයනය කොට මෙම නිෂ්පාදනාගාරය පවත්වාගෙන ගොස් ඇත්තේ.
ලද තොරතුරකට අනුව උපාය දූතයන් යොදවා සිදුකළ විමර්ශනයකට පසු එම නිවස සෝදිසියකට පත් කර ඇති අතර වැටලීම සිදුවන විටත් සැකකරුවෙකු කුෂ් පැකට් කරමින් සිට ඇති බවත් බස්නාහිර පළාත දකුණ දිසාව අපරාධ කොට්ඨාසය පවසනවා.
අත්අඩංගුවට ගත් මෙම මත්ද්රව්ය නිෂ්පාදනාගාරය පවත්වාගෙන යාම භාරව කටයුතු කරන මරදාන ප්රදේශයේ පදිංචි පුද්ගලයාගෙන් සිදු කළ ප්රශ්න කිරීමේ දී එංගලන්තයේ සහ ඔස්ට්රේලියාවේ පදිංචි පුද්ගලයන් දෙදෙනකු මෙම ජාවාරම සඳහා මුදල් ආයෝජනය කරන බවට අනාවරණය වී තිබෙනවා.පොලිස් භාරයට ගත් කුෂ් පැළවල වැඩිම උස ප්රමාණය අඩි හතරක්.අත්අඩංගුවට ගත් සැකකරුවන් දෙදෙනා අධිකරණය වෙත ඉදිරිපත් කිරීමට නියමිතයි.
