මාසයකට ආසන්න කාලයක් තිස්සේ විගණකාධිපති තනතුර පුරප්පාඩුව පැවතීම හේතුවෙන් ජාතික විගණන කාර්යාලයේ මූල්ය හා පරිපාලන කටයුතු බරපතළ අර්බුදයකට ලක්ව ඇති බව වාර්තා වේ. ආයතන ප්රධානියෙකු නොමැති වීම නිසා නව වසරට අදාළ මූල්ය බලතල බෙදා දීමට නොහැකි වී ඇති අතර, මේ හේතුවෙන් විගණන කාර්යාලයේ සේවය කරන 2000 කට අධික සේවක පිරිසගේ ජනවාරි මාසයේ වැටුප් ගෙවීමේ කටයුතු පවා අවදානමකට ලක්ව තිබේ.
විගණකාධිපතිවරයා නොමැති වීම නිසා ආයතනයේ දෛනික කටයුතුවලට ද දැඩි බලපෑම් එල්ල වී ඇත. විශේෂයෙන්ම විගණන කටයුතු සඳහා යොදා ගන්නා වාහන 30 කට අධික සංඛ්යාවකට ඉන්ධන නිකුත් කිරීමේ සිට සියලු මූල්ය ප්රතිපාදන වෙන් කිරීමේ ගැටලු පැන නැගී ඇති බව එම කාර්යාලය පෙන්වා දෙයි. පවතින තත්ත්වය පිළිබඳව රජයේ බලධාරීන් දැනුවත් කිරීමට නියෝජ්ය විගණකාධිපති (පාලන) ඕෂාන් ප්රනාන්දු මහතා පියවර ගෙන තිබේ.
මේ සම්බන්ධයෙන් කරුණු දක්වමින් ජාතික විගණන කාර්යාලය විසින් ජනාධිපතිවරයා සහ ජනාධිපති ලේකම්වරයා වෙත ලිපි කිහිපයක්ම යොමු කර ඇති අතර, ඊයේ (06) දිනයේදී ද ජනාධිපති ලේකම්වරයා වෙත යළිත් ලිපියක් යොමු කරමින් මෙම මූල්ය අර්බුදය පිළිබඳව අනතුරු අඟවා ඇත. රාජ්ය මූල්ය විනය පවත්වාගෙන යන ප්රධානතම ආයතනයේ ප්රධානියා පත් කිරීම ප්රමාද වීම සමස්ත රාජ්ය යාන්ත්රණයටම බලපෑමක් විය හැකි බව විචාරකයෝ පවසති.
