විදේශීය අන්තවාදී ත්රස්ත සංවිධානයක් වන ISIS (ඉස්ලාමීය රාජ්යය) මෙරට ව්යාප්ත කිරීමට ආධාර අනුබල දෙමින්, ඒ සඳහා මුල්ය ආධාර ලබා දුන් බවට සැක කෙරෙන පුද්ගලයන් 15 දෙනෙකු සම්බන්ධයෙන් විමර්ශනයක් ආරම්භ කළ බව ත්රස්ත විමර්ශන කොට්ඨාසය (TID) අද (17) කොළඹ අතිරේක මහේස්ත්රාත් ලහිරු සිල්වා මහතා හමුවේ දැන්වීය.
ත්රස්ත හා මුල්ය විමර්ශන අංශ ස්ථානාධිපති විසින් කරන ලද පැමිණිල්ලකට අනුව, මෙම විමර්ශන කටයුතු සිදුකරන බව ත්රස්ත විමර්ශන කොට්ඨාශය අධිකරණයට දන්වා සිටියේ, පැමිණිලි 15ක් ගොනු කරමිනි.
විමර්ශන නිලධාරියා අධිකරණයට දැනුම් දුන්නේ, මෙම සැකකරුවන් පාස්කු ප්රහාරය එල්ල කළ සංවිධාන සාමාජිකයන් හට අන්තවාදී දේශන පැවැත්වීම ඇතුළු ISIS සංවිධානයේ ක්රියාකාරකම් සඳහා ආධාර අනුබල ලබාදීම සහ මූල්ය ආධාර සැපයීම සිදුකර ඇති බවට තොරතුරු අනාවරණය වන බවය.
තවද, මෙම සැකකරුවන් අතරින් ඇතැම් පුද්ගලයන්ට පාස්කු දින ත්රස්ත ප්රහාරයට ආධාර අනුබල දීම සම්බන්ධයෙන් දැනටමත් මහාධිකරණය හමුවේ අධි චෝදනා ගොනු කර ඇති බවටද ත්රස්ත විමර්ශන කොට්ඨාසය අධිකරණයට කරුණු වාර්තා කළේය. අල් කයිඩා සහ ISIS ත්රස්ත සංවිධානවල දේශනා වලට සහභාගිවීම හා ඒවාට මුදල් සැපයීම සම්බන්ධයෙන් මෙම විමර්ශනය සිදු කෙරේ.
ඉදිරිපත් වූ කරුණු සලකා බැලූ අතිරේක මහේස්ත්රාත්වරයා, මෙම විමර්ශනවල ප්රගතිය පිළිබඳ වාර්තාවක් කඩිනමින් අධිකරණයට ඉදිරිපත් කරන ලෙසට ත්රස්ත විමර්ශන කොට්ඨාසයට නියෝග කළේය.
